“غادة عبد الرازق” تتحدث عن معاناتها مع المرض النفسي وتكشف سر زواجها في سن صغيرة

حلت الفنانة والنجمة الكبيرة “غادة عبد الرازق” ضيفة على الإعلامية “منى الشاذلي” من خلال برنامجها الشهير “معكم .. منى الشاذلي” حيث ضمت الحلقة مشاركتها مع ابنتها “روتانا” وحفيدتيها “خديجة وجويرية”، وفوجئت “عبد الرازق” بالاحتفاء الشديد والتصفيق الحاد من قبل الجمهور فور دخولها الاستوديو حيث علقت قائلة: “هعيط” لترد عليها “منى الشاذلي” قائلة: “أنا لسة ماتكلمتش يا غادة” لتبكي “غادة عبد الرازق” فور دخولها وتعلق “الشاذلي”: “دخول ملكي يليق بموهبتك”.

وتحدثت “غادة عبد الرازق” خلال البرنامج عن طفولتها وبداية مشاركتها في التمثيل قائلة: “أنا كانت موهبتي الوحيدة إني أرقص قدام المراية وأسرق باروكات أمي وأقلام الروج، لكن كنت بتفرج على التليفزيون ونفسي أبقى مشهورة، وأمشي في الشارع الناس تعرفني” وقالت عن بدايتها على خشبة مسرح البالون مرورًا بالإعلانات ثم الفوازير: “تجربة الفوازير اللى أنا عملتها ندمانة عليها جدًا .. حسيت إنها مش بتاعتي .. مش أنا اللى أقدمها”.

وتطرقت “عبد الرازق” للحديث عن حياتها الشخصية حيث كشفت سر زواجها في سن صغيرة قائلة: ” مكنتش مضطرة، أنا كانت عقدتي إن نفسي أخرج، بابا كان قافل علينا جدا، وبعد ما توفى ماما كمان كانت قافلة علي جدا، وكان عندي وقتها 12 سنة، بينما يسرية كانت في الكلية”.

وأضافت: “كنت بشوف أختي مخطوبة، وكانت علشان مخطوبة بتخرج، فأنا كنت هموت عايزه أخرج”، مضيفة: “اتجوزت بدري عشان أتحرر، ونص الحكاية كان حب والنص التاني كان عشان أخرج، والد روتانا بنتي كان مع يسرية أختي في الجامعة واستمروا كلهم شلة مع بعض، فروحت معاها عيد ميلاد وأنا عندي 17 سنة، هو شافني واتكلم معايا وقال بس هي دي البنت المناسبة”.

وأوضحت غادة عبد الرازق أن ابنتها ولدت في مصر لكنها تحمل جنسية والدها السعودية، قائلة: “لما اتجوزت قعدت في جدة 5 سنين، كنت بروح وآجي وماما تجيلي مكنتش منعزلة عن أهلي”.

وتحدثت عن طلاقها، قائلة: “بعد ما حصلت الخناقات بيني وبين زوجي فاكرة إن ماما كانت بتصلي، وفجأة سمعنا صوت حد وقع، ودخلنا لقينا أمي أصيبت بإغماء أثناء الصلاة”، وواصلت: “لما قررت الانفصال والدتي اتصدمت وتعبت وكانت خايفة ياخدوا مني روتانا، لكن باباها راجل محترم وكان الانفصال سلس جدًا، وقال مش أنا ولا عيلتي اللي أحرم أم من بنتها”.

وعن علاقتها بابنتها قالت: “أنا كنت شديدة غصب عني من اللي اتربيت عليه من أمي وأبويا، روتانا برج العذراء بتخاف مني وعنيدة جدًّا وكنت أقول لها ما تاكليش كتير أصحابك رفيعين جدًّا، بس اللي أطلبه منها كانت تعمل عكسه، أقول لها ما تصبغيش شعرك تاني يوم ألاقيها صابغاه أحمر” وتابعت: “أقول لبنتي روتانا أنا آسفة إني ما كنتش في البداية الأم المثالية اللي بهتم بيك، كنت مقصرة وغصب عني بس دي المفروض ما تبقاش حجة اهتميت بالشغل وأوفر لها حاجات اللبس والمكياج والمدرسة والمصاريف بس فيه حاجات أهم من كدا”.

 لترد ابنتها قائلة: “أنا ماكنتش متمردة ولكن من باب العند كنت بعمل عكس اللي ماما تقول عليه، بس أنا وهي دلوقت بقينا أكتر من أصحاب وفيه تصالح ما بيننا ومفيش أي حاجة مضايقاني منها بسبب اللي قالته عن تقصيرها معايا فترة طفولتي”.

وتحدثت الفنانة “غادة عبد الرازق” عن دورها في حكاية “تحت الحزام” من مسلسل “حدث بالفعل”، قائلة: “شخصية “دكتورة عليا” اللي قدمتها شخصية حقيقية موجودة بالفعل، تم اقتباس قصتها عن طريق أحد الأطباء النفسيين”.

وأشارت “عبد الرازق” إلى معاناتها مع المرض النفسي قائلة: “بقالي 30 سنة بأخد علاج نفسي، وده مش عيب، المشكلة إن فيه حاجات مهما حصلت مقدرش أقولها لأقرب الناس ليا ودي فائدة الدكتور النفسي”.