صابرين تكشف مفاجأة عن علاقتها بالدين بعد خلع الحجاب إيماني زاد وحافظت على صلواتي أكتر

كشفت الفنانة “صابرين” تفاصيل رحلتها مع الحجاب، بداية من قرار ارتدائه خلال فترة تألقها الفني، وصولًا إلى خلعه بعد سنوات. موضحة أن القرارين جاءا بصورة مفاجئة، وأن تجربتها الأخيرة غيّرت علاقتها بنفسها وبإيمانها. وذلك خلال استضافتها في بودكاست “قصتي” مع “محمد قيس”.

درس ديني قاد صابرين إلى ارتداء الحجاب

استعادت “صابرين” اللحظة التي قررت فيها ارتداء الحجاب، موضحة أن الأمر بدأ أثناء استماعها إلى درس ديني على شاشة التلفزيون. في وقت كانت تجلس فيه بجوار والدتها، بينما كان شقيقها يتحدث معها عن الموت واحتمال وقوع حادث لها.

وقالت: “كنت بسمع درس دين في التليفزيون كنت قاعدة جنب ماما وكان أخويا بيزن عليا ويقولي افرضي ماشية بالعربية وعملتي حادثة وموتي. سمعت درس الدين وابتديت انسحب انسحب، كان جنبي طرحة الصلاة لبستها وقلت “أشهد أن لا إله إلا الله وأن محمد رسول الله”. ماما أنا اتحجبت، ماما قالتلي مقدرش أتكلم، قرار صعب أن أي حد يقولك مع أو ضد، أنا كنت في عز نجوميتي. البني آدم مع ربنا طول الوقت مش بالطرحة دي مجرد حاجات خارجية الداخلي أهم، كنت حاسة براحة نفسية في المرحلة دي. وهدوء يمكن علشان هبعد وهاخد نفس لأني كنت بجري كتير أنا بدأت وأنا عندي 4 سنين”.

عامان من التفكير قبل اتخاذ قرار الخلع

وأوضحت الفنانة أنها فكرت في خلع الحجاب على مدار عامين قبل اتخاذ القرار، بعدما شعرت بأن صورتها الخارجية بدأت تطغى على هويتها الإنسانية والفنية. رغم نجاحاتها والأدوار التي قدمتها والجوائز التي حصلت عليها. كما أزعجتها التعليقات التي اختزلت ظهورها الفني في مسألة الباروكة، بدلًا من الاهتمام بأعمالها.

وأضافت: “كان بقالي سنتين بقولهم أنا عايزة أفك الحجاب أنا حاسة إني دايسة على الإنسانة والفنانة، قعدت أقول بعمل أدوار عظيمة. وباخد جوايز حلوة أوي والناس بتحتفي بيا وفي الآخر خالص السوشيال ميديا تكتب “باروكة راحت باروكة جات”. يمكن كان خطأ الباروكة، أنا حسيت وأنا بتفرج على نفسي كنت بعمل مسلسل كوميدي ولقيت مكتوب صابرين بتعمل مسلسل كوميدي بباروكة استفزيت. ابتديت أبقى في سن بطلع أم علي ربيع، حسيت أن عيشي لحظاتك العمر قصير استمتعي متبقيش كدابة خصوصًا مع نفسك. ليه طول الوقت أبقى كدابة مع نفسي وأقول لأ وألاقي ناس تهاجمني ليه المفروض أفرح بنجاحي ليه أرد على ناس. ونتخانق لحد دلوقتي لما بتنزلي أي صورة الناس تكتب هي مش دي كانت محجبة روحي بقى جهنم وبئس المصير. أحكام قوية جدًا كأنهم أخدوا صكوك مين هيدخل الجنة ومين هيدخل النار”.

صورة على فيسبوك أشعلت المواجهة مع أسرتها

وتحدثت “صابرين” عن ردود الفعل التي صاحبت قرارها، مشيرة إلى أنها كانت تتمنى أن تجد من يمنحها القوة والدعم في مواجهة الانتقادات. لكنها فوجئت بحجم الجدل الذي أثارته صورة نشرتها عبر “فيسبوك” بعد صبغ شعرها، دون أن تخبر أحدًا مسبقًا.

وقالت: “أنا كنت بقول لكل اللي حواليا أنا هفك الحجاب كنت عايزة حد يقويني ويقف في ضهري، أكتر موقف لن أنساه موقف مامتي. أنا نزلت رحت عند الكوافير صبغت شعري وصورت صورة ونزلتها على فيسبوك من غير ما أي حد يعرف. وفجأة حسيت الكرة الأرضية اتهزت بيا، ابني قالي ليه كدا يا ماما إحنا خايفين عليكي من الحرب اللي هتقوم عليكي على السوشيال ميديا. أخويا اتضايق جدًا وكتب على جروب عائلي على واتساب كلام جامد، أنا خرجت من الجروب ودي كانت أول مرة أعمل موقف كده. أني خلاص مش هسمع غير نفسي لأني كنت توهت مني طول الوقت خايفة حاسة الناس لما تشوفني هتقولي يا أم باروكة. أنا جامدة أنا قوية بإيماني بربي ربنا مش الناس دي ربنا أكرم من كده بكتير، جالي قوة نفسية رهيبة أقفي واجمدي. ماما دخلت على الجروب عملت فويس وردت على الكل، أخويا بالليل جيه وحضني وقالي دي حاجة بتاعتك بينك وبين ربنا. ولازم تبقي عارفة إننا بنحبك ونحترمك ومش عايزين حد يتكلم عليكي نص كلمة أنا بفتخر بيكي طول عمري ولبستي أو قلعتي الحجاب”.

وكشفت “صابرين” عن الحالة النفسية التي كانت تمر بها وقت اتخاذ القرار، مؤكدة أنها كانت مستعدة لمواجهة أي تبعات شخصية أو عائلية. حتى لو وصل الأمر إلى رفض المقربين منها لقرارها، قائلة: “أنا كنت في مرحلة أني نسيت إني امرأة. في اللحظة اللي خلعت فيها الحجاب كنت متقبلة كل حاجة أخويا لو عايز يتبرى مني أوكي جوزي لو عايز يطلقني أوكي”.

الأخلاقيات مش بتتجزأ .. صابرين تتحدث عن زيادة إيمانها

وعن تأثير خلع الحجاب على علاقتها بالله، أكدت الفنانة أنها لم تشعر بتراجع إيمانها، بل لاحظت زيادة حرصها على الصلاة والطاعة. موضحة أن التزام الإنسان لا ينبغي أن يقتصر على المظهر الخارجي، وأن مراجعة النفس أصبحت حاضرة في تعاملاتها اليومية.

وقالت: “الأخلاقيات مش بتتجزأ، من جوايا جالي حته إني متحجبة وإني بمثل حاجات محترمة فساعات كنت بفوت صلاة. أو مش بعمل الورد بتاعي أو مش ببقى خايفة حاسة بأمان، لما فكيت بقيت بخاف أكتر وازدادت طاعتي أكتر. وحافظت على صلواتي أكتر ودي حاجة المفروض مقولهاش بس حقيقي ده اللي حصل، كنت حاسة أن ساعات بتحس بغرور. أنا لسه راجعة من الحج أو العمرة كنت حاسة بالأمان إني عاملة كل حاجة مظبوطة، دلوقتي بقيت طيب لو موتي النفس اللوامة. النفس اللوامة كانت هادية أثناء الحجاب لما فكيت زادت أوي سواء في الكلام مع الناس ومعاملة الآخرين. بحس أن ربنا طول الوقت قدامي زاد التزامي وقوة إيماني”.

“الملحد” و “إقامة جبرية” أحدث أعمال صابرين

وعلى الصعيد الفني، كان فيلم “الملحد” آخر أعمال “صابرين” السينمائية، وشارك في بطولته “أحمد حاتم” و “نجلاء بدر” و “شيرين رضا”. و “محمود حميدة” و “تارا عماد” وهو من تأليف “إبراهيم عيسى” وإخراج “محمد جمال العدل”.

أما تلفزيونيًا، فكان مسلسل “إقامة جبرية” آخر أعمالها، وشاركها البطولة “هنا الزاهد” و “محمد الشرنوبي” و “ثراء جبيل”. و “عايدة رياض” و “محمود البزاوي” و “لطيفة التركي” والعمل من تأليف “أحمد عادل” وإخراج “أحمد سمير فرج”.