حقيقة سرقة أغنية محمد الشرنوبي النفسية

 

بعد طرح اغنية محمد الشرنوبي الجديدة النفسية التي حققت نجاح كبير ونسبة مشاهدة عالية على موقع الفيديوهات العالمي “يوتيوب”، أثارت اغنية محمد الشرنوبي الجديدة النفسية جدل كبير على مواقع التواصل الإجتماعي، بعد أن ظهرت أكثر من أغنية تحمل نفس الاسم، خاصًة أغنية “النفسية” التي طرحها الفنان محمد حمزة قبل طرح أغنية محمد الشرنوبي بيوم واحد فقط!.

 

 

أصدر الشاعر والكاتب أيمن بهجت قمر بيان رسمي عبر حسابه الشخصي على موقع التواصل الإجتماعي “فيسبوك”، يوضح فيه ملكيته الفكرية لكلمات وفكرة أغنية “النفسية” للمطرب محمد الشرنوبي، وأنه سوف يلجأ إلى القانون ليدافع عن حقه.

افتتح ايمن البيان كالآتي “التعليق الوحيد والأخير اللى هقوله بخصوص أغنية النفسية بإختصار، أنا الحمد لله مش محتاج بعد العمر ده إنى اتخانق مع حد وادخل فى نزاع على آخر الزمن على أغنية ده شئ ما حصلش معايا فى بداياتى فأكيد يعنى مش المفروض إنه يحصل بعد ٢٧ سنه تعبت فيهم وبنيت اسم وسمعه الحمد لله مش هزكى نفسى”.

تابع الشاعر كلامه قائلًا “أنا كتبت الأغنيه دى من حوالى ٣ سنين وعملناها أنا ومحمد يحيى لمحمد الشرنوبى من فتره طويلة سنه ونص وأكتر والكلام اترخص فى الرقابة باسمى فى أول السنة أول مارس وكل شئ كان تمام لحد ما لقيت من كام يوم مطرب شاب والله والله عمرى ما كلمته ولا أعرفه شخصيا ومش زى ما هو ماشى يقول، المهم لما لقيت الاسم والفكرة والمحتوى كله متشابه من البرومو ولقيت لوجو صوت الدلتا، قلت بلاش أعمل بلبلة للولد مع الشركة، كلمت ملحن شاب صاحبه أنا أعرفه وبلغته إن فيه أغنية لمحمد الشرنوبى، وكده حرام وخصوصا إن صاحبه قاللى فعلا إحنا عرفنا من وقت مهرجان الجونة إن فيه أغنيه معموله شبهها قلت له طيب الأغنيه دى بفكرتها متسجلة باسمي في المصنفات الفنية يبقى الحل نعمل زى الناس المحترمين يا تغيروا الكلام يا نلجأ لجهه تحكم بيني وبينهم وهى جهاز الرقابة على المصنفات الفنية”.

أضاف قائلاً “الملحن بلغنى إنه مش عارف يحل ومش طرف فى الموضوع عكس اللى عرفته بعد كده طبعا ..المهم قلت له كده أنا هضطر أكلم حد فى صوت الدلتا وفعلا كلمت الأستاذ حماده اسماعيل والراجل مشكورا رفع البوستات والبروموهات لإن مش منطقي أسيب فكرتى مشاع وتتحرق ولما تنزل يقولوا إنى واخدها من حد تانى وعشان المطرب الشاب ما يتظلمش ويدفع ثمن النزاع قلت لحماده إسماعيل وهو موجود يقدر يشهد على كلامى، برغم إنى مش ملزم بالمرة إنى مستعد أهدى الولد أغنيه ومايحرقش الغنوه بتاعة الشرنوبي، وبلغت صديق المطرب الملحن الشاب وقاللى هبلغهم وفجأه جريوا سبقوا ونزلوا الأغنية قبلنا برضه بيوم والمطرب مشى يقول فى المواقع إنى كلمته وعرضت عليه أغنية وهو رفض”.

 

 

واصل أيمن كلامه قائلًا “حقيقى مهزلة وأسلوب رخيص ومافهوش أدنى أنواع الاحترام لفرق الخبرة والسن وللزمالة وشغالين كمان حسبى الله ونعم الوكيل وآيات قرآنية، ودعا علينا وكإن محمد الشرنوبى ده برضه مش مطرب في بداية حياته ومحتاج برضه الفرصة دي، والغريبة إنهم منزلين بوست بيسخروا منى فيه وبيتكلموا بمنتهى عدم الاحترام وبيبرروا إن جملة النفسية محتاجة دى ملك الناس ومش حكر على حد طبعا ده كلام من واحد تافه معندوش أى فكرة وجاهل طب ما الكلام كله ملك الناس، وأى حاجة بنكتبها الناس بتقولها! وهو ده أساس نجاح الشاعر اللي بيلقط الكلمة أو اللحظة ويحولها لأغنية وما دام اتسجلت باسمي بعنوانها وبفكرتها ومحتواها يبقى خلاص حتى لو توارد خواطر ما ينفعش غير لو هما معاهم ورق يحفظ حقهم بترخيص الكلام قبلي”.

اختتم الشاعر أيمن بهجت قمر البيان قائلًا “يعنى أنا أألف قصة وتنزل فيلم تيجى حضرتك تألف زيها وتقوللى ما أنا معرفش وتوارد خواطر والأفكار مش حكر على حد،  كفاية استهزاء بحقوق الناس كفاية عدم احترام لتاريخ الناس كفاية كل ما تتزنق تحولها لصراع أجيال مع شخص هو هو نفسه اللى لحد أسبوع فات بتلجأله وقت ما بتحتاج لضهر ليك وكان أجدع واحد فى الدنيا وقت ما كانت جدعنته ماشيه مع مصلحتك، عموما بينا القانون مش عشان حاجة هاخدها من وراكوا مثلا لكن عشان زى ما كنت واحد من اللى علموكوا إزاى تدوروا على حقوقكوا هعلمكوا برضه إزاي ما تعتدوش على حقوق الناس ونفسى طويل ويمهل ولا يهمل”.

يذكر أن أغنية “النفسية” من غناء محمد الشرنوبي، وكلمات أيمن بهجت قمر، وألحان محمد يحيى،  وتوزيع إلهامى دهيمة، وإنتاج شركة إيرث برودكشن Earth production، أما أغنية “النفسية محتاجة” فهي غناء محمد حمزة، وكلمات محمد القاياتي، وألحان حمزة، وتوزيع هاني يعقوب، وميكس وماستر هاني محروس، من إنتاج شركة MG Productoin.

الجدير بالذكر أن المغنية اليمنية بلقيس فتحي طرحت في أبريل/نيسان 2018، أغنية بعنوان “النفسية محتاجة”، وحققت نجاح كبير، حيث تجاوزت المليون ونصف المليون مشاهدة، وبعد طرحها بحوالي سبعة أشهر، طرح المطرب السوداني عادل حسن أغنية أخرى بعنوان “النفسية محتاجة”، من كلمات وألحان أمجد حمزة، محققة 63 ألف مشاهدة.