مي عز الدين تحكي عن مساندة تامر حسني ويسرا لها على مدار حياتها

تحدثت الفنانة “مي عز الدين” خلال الجزء الثاني من لقاءها مع الإعلامية الكبيرة “إسعاد يونس” في برنامج “صاحبة السعادة”. عن الفنانين الذين دعموها ووقفوا بجانبها أثناء المحن التي مرت بها.

حيث فاجأتها صاحبة السعادة الفنانة “إسعاد يونس” بسؤالها قائلة: “مين اللي حسيتي أنه ما يستاهلش صداقتك ومين اللي حسيتي أنه وقف جنبك. ولا الحالة دي مش حقيقية ولا إيه؟”.

مي عز الدين تشيد بـ يسرا وتامر حسني: كانوا سند ليا في الدنيا

وردت “مي عز الدين” قائلة: “لا هو أنا بصراحة عندي طابع لأن أنا حد مقصر في واجبات كتير مع ناس فمبرمجه نفسي أن أنا ما ازعلش. مابصش واقعد أدور وافكر مين اللي ما عملش لكن لما حد بيقف جنبي واقفه جامدة في وقت زي ده طبعًا بفضل فاكراها له. فأنا ما عنديش حد زعلانه منه حسيته مقصر خالص لكن أنا في اثنين مش سايبني يعني على مدار مشوار حياتي. ومش ده مش شرط يبقى كان المنتظر منهم خالص لأن هما ساعدوني في كاريري بس مش لازم يساعدوني. كمان يبقوا سند ليكي في الدنيا، أستاذة يسرا وتامر حسني أول ما هتبقي في حاجة هتلاقيهم”.

مي عز الدين: تامر حسني ويسرا وقفوا معايا في مراسم وفاة ماما

وتابعت: “يسرا وقفت معايا مش في مرضي الأخير بس وقفت معايا جامد قوي ساعة ماما ودايمًا تقول لي لو احتجتي أي حاجة اسأليني. وتامر حسني نفس الحاجة هو اللي قام بمراسم ماما أصلاً أنا ما كنتش أصلاً بقف على طول يعني أنا كنت بقع فما نزلتش ما عملتش حاجه تامر اللي عمل”.

مي عز الدين: تامر حسني قعد يضحكني لما كانت كل الغرز هتفتح

وأضافت “مي عز الدين”: “وفي آخر تعب ليا في المستشفى والعملية اللي عملتها دي تامر حسني جالي على طول. ودي حاجة من قلوب الناس دي بجد لأن الحاجات دي أو بالذات حياتي أنا مابتتصورش هو عرف من السوشيال ميديا برده. ولكن على طول اتحرك واتصل بصديقتي الأنتيم وعرف احنا فين وسأل على المستشفى وكلم زوجي وجه وقضى معاه اليوم كله. في المستشفى وبهدل الدنيا وضحك الممرضات وقعد يضحكني لما كانت كل الغرز هتفتح”.

يذكر أن الفنانة الجميلة “مي عز الدين” تتمتع بقاعدة جماهيرية كبيرة ولها العديد من الأعمال الفنية البارزة. وبالرغم من أنها غابت عن موسم رمضان 2026، بعد خروج مسلسلها “قبل وبعد” من السباق الرمضاني إلا أنها كانت دائمًا حاضرة في الأذهان.

آخر أعمال مي عز الدين

وكانت “مي عز الدين” قد شاركت في موسم دراما رمضان 2025 من خلال مسلسل “قلبي ومفتاحه” مع الفنان والنجم الكبير “آسر ياسين”. حيث قدما نموذجًا مختلفًا عن أعمالهما السابقة وشخصيات جديدة تمامًا على النمط الذي تعودا عليه. وذلك بمشاركة كل من “دياب” و “أشرف عبد الباقي” و “عايدة رياض” و “سما إبراهيم” و “أحمد خالد صالح” و “محمود عزب”، تأليف وإخراج “تامر محسن”.