سامر أبو طالب يعلق على تصريحات رامي صبري محدش جاب سيرتك وانت الوحيد اللي اتهم الصناع انهم ماعندهمش جديد

تحدث الفنان “رامي صبري” في الآونة الأخيرة عن تجاهل بعض المطربين للملحنين والمؤلفين حيث اعترض على ما يتم تداوله. وهو ما جعل الملحن “سامر أبو طالب” يرد عليه من خلال مقطع فيديو نشره عبر حسابه الشخصي على موقع التواصل الاجتماعي فيسبوك.

سامر أبو طالب: بحب احتفظ برأيي لنفسي وبركز في شغلي

وقال “سامر أبو طالب” في الفيديو: “مبحبش أطلع أتكلم عن أي حاجة وبحب احتفظ برأيي لنفسي وبركز في شغلي. وبنجح والحمد لله خطواتي كويسة، بقالنا كام يوم زمايلي الملحنين والشعراء حاسين أن في تجاهل وطلعوا واتكلموا. وقالوا كلمتين من قلبهم مضايقنهم وأنا ضميت صوتي لصوتهم”.

وأوضح أن المقصود من الحديث عن التجاهل ليس البحث عن اهتمام من المطربين، مضيفًا: “التجاهل هنا مش إننا بنشحت من حد. أنه يبص علينا أو يسمعنا لأ فكرة التجاهل هنا إننا لما نبعت لحد عارفنا ومسجل أرقامنا وفي بينا كلام وقعدات مزيكا. وفي ناس اشتغلنا معاهم قبل كده ونجحنا مع بعض ففكرة أن أنت متردش أصلاً مش حلوة لا في حقك كنجم. ولا في حقنا كفنانين وصناع لأن الموضوع ده مؤذي نفسيًا”.

سامر أبو طالب لرامي صبري: محدش جاب سيرتك

وتابع مؤكدًا أن الرد بالرفض أفضل من تجاهل الرسائل، قائلاً: “تقدر بكل بساطة تقول لا مش عاجبني مش حلو مش اللي أنا عايزه. ومحدش هيزعل بالعكس فكرة أنك ترد أصلاً ده تقدير منك للشخص اللي بيبعتلك سواء جديد أو ليه اسم”.

ووجّه “سامر” حديثه مباشرة إلى “رامي صبري”، قائلاً: “هخص بالذكر النجم الكبير رامي صبري اللي أنا بحبه جدًا. على المستوى الشخصي وعلى المستوى الفني، مبدئيًا محدش جاب سيرتك أصلاً في الموضوع ده لا من قريب ولا من بعيد. أه أنت من الناس اللي مبتردش وأنت الوحيد اللي طلع اتهم الصناع أنهم معندهومش جديد”.

سامر أبو طالب يطالب رامي صبري بالاطلاع على الأعمال المرسلة قبل إصدار الأحكام

وأضاف: “لا اسمحلي أقولك إحنا عندنا جديد ومتطورين وهتكلم عن نفسي أنا بشوف نفسي مميز جدًا في حتتي وفي ألحاني. وبعمل حاجات الحمد لله متطورة وجديدة، أنت بس اللي مبتفتحش الشات تشوف سامر أبو طالب باعتلك إيه أو غيره”.

كما طالب “رامي صبري” بالاطلاع على الأعمال المرسلة قبل إصدار الأحكام، قائلاً: “قبل ما تتهمنا يا رامي افتح الشات. واسمع عشان لما تتكلم يبقى عن حقيقة”، مشيرًا إلى أن العديد من صناع الموسيقى يمتلكون سجلاً حافلاً من النجاحات.

واستشهد “أبو طالب” بمشواره الفني قائلاً: “أنا عن نفسي نجحت مع الهضبة عمرو دياب في “معدي الناس” و “قمر إيه”. ومع النجم تامر حسني في “ينهار أبيض و “هيموت ويرجع”، أنا بقالي 12 سنة ملحن وخطواتي فيها نجاحات”.

وأكد أنه لا يزال يتطلع للتعاون مع عدد من النجوم، ومن بينهم “رامي صبري”، مضيفًا: “وأنت من ضمن النجوم يا رامي. اللي حابب اشتغل معاك ولما تطلع تتهم الصناع الاتهام ده اسمحلي أرد عليك واقول لأ انت مش واخد بالك في ناس شطار. سواء من جيلي أو جيل قبلي أو بعدي”.

واختتم “سامر أبو طالب” حديثه قائلاً: “أنت مكنتش موفق في التصريح اللي قلته محدش قال رامي صبري إحنا اتكلمنا عن المطربين عمومًا. أنكم مبتقدروش الصناع، حط نفسك مكاننا اللي بيبعتولك دول بيحبوك وعايزين يشتغلوا معاك، أنا مش طالع بهاجمك. وأنت لو بترد على التليفون كنت كلمتك وعاتبتك، أنت أخويا الكبير مكنتش أحب أبدًا أقول الكلمتين دول على السوشيال ميديا. بس أنت اتكلمت على السوشيال ميديا وهرد عليك عليها”.

رامي صبري يثير الجدل بتعليقه على شكوى الملحنين

وكان “رامي صبري” قد أثار الجدل بعد تعليقه على شكوى بعض الملحنين من تجاهل المطربين، حيث كتب عبر خاصية “ستوري”: “عدم الرد على ملحنين ومؤلفين أو مبدعين بشكل عام، هو عدم التجديد، وإن مفيش أفكار مختلفة”.

وأضاف: “في ناس متضايقة اني كتبت ستوري إن الملحنين اللي بتبعتلي شغل ما بيعملوش حاجة جديدة ومختلفة أيوة دي حقيقة. يعني أنا أعمل الأغنية وخلاص عشان هي بتتبعتلي”.

واختتم “رامي صبري” تصريحاته قائلاً: “أنا بعمل الحاجات اللي شايفها من وجهة نظري مختلفة وجديدة ودا مش المفروض يضايق حد. إحنا المشكلة مش في الملحنين والشعراء كلهم كويسين، لكن إحنا مطربين مش كتير، احنا في السوق المصري حوالي من 7 إلى 10 مطربين. بالكتير خالص، والملحنين والشعراء كتير جدا”.