خضر محمد خضر يرد على اتهامه بالتسبب في وفاة ياسمين أبو النجا قوة قهرية أجبرتنا على الطلاق

خرج المخرج “خضر محمد خضر” عن صمته للرد على الانتقادات والاتهامات التي طالته عقب وفاة طليقته الفنانة “ياسمين سيف أبو النجا”. خاصة ما يتعلق بزواجه من أخرى بعد انفصاله عنها، وما تردد حول تسبب ذلك في تدهور حالتها النفسية والصحية.

وأكد “خضر محمد خضر”، في منشور نشره عبر حسابه الشخصي على موقع التواصل الاجتماعي “فيسبوك”. أن تفاصيل علاقته بـ “ياسمين” منذ سنوات الزواج وحتى ما بعد الطلاق تحمل العديد من الأمور التي لا يعرفها الجمهور. مشيرًا إلى أن الانفصال لم يكن بالسهولة التي يتصورها البعض.

وكتب “خضر محمد خضر” في منشوره: “على فكرة انا بعرف ارد كويس وبعرف احكي كويس .. يعني أنا مستعد أحكيلكم عادي عن اسرار بيوتنا اللي ماحدش يعرفها غير المقربين مننا”.

وممكن احكيلكم عن علاقتي الزوجية أنا وياسمين من بعد ما خلفنا ومن ساعة ما دكاترة فرنسا حذرونا من الحمل مرة تانية.

وممكن أحكيلكم عن بداية النهاية من سبتمبر ٢٠٢٤ بعد ١٨ سنة جواز.

قوة قهرية أجبرتنا … خضر محمد خضر يكشف سبب طلاقه من ياسمين أبو النجا

وممكن احكيلكم مين أجبرني أنا وياسمين على الطلاق بالعافية وايه السبب وليه ياسمين ماعرفتش تقف قدام القوة القهرية ديه.

وممكن احكيلكم مين اجبرها تسيب البيت ٤ اشهر وماترجعش غير لما نتطلق وبقيت أنا عايش لوحدي ٤ اشهر في بيتنا. وبنتي عايشة ٤ اشهر مع امي وهي عايشة ٤ اشهر اجباري في بيت تالت.

وممكن احكيلكم أنا وياسمين كنا بنتقابل في الشارع اللي ورا بيتهم في السر ازاي عشان ترجع البيت وفشلنا برضه بسبب القوة القهرية ديه.

وممكن احكيلكم عن صداقتي أنا وياسمين وعلاقتنا بعد الطلاق لما رجعت بيتنا وانا مشيت وقعدت جنب امي عشان كانت بتتعالج من السرطان.

وممكن احكيلكم عن مكالماتنا أنا وياسمين ورسايلنا كل يوم وزياراتنا كل اسبوع.

وممكن احكيلكم أنا ليه اتجوزت بعد الانفصال ب ١٣ شهر وعملت فرح بالرغم ان مراتي ماكانش فارق معاها نعمل فرح .. وياسمين كانت على علم وزين حضرت الفرح بدون اي مشاكل او نفسيات .. مراتي اللي انتوا نازلين فيها تجريح وتقطيع بدون ذنب .. زي ما نزلتوا تجريح في ياسمين بدون ذنب لما طلعت معايا في مهرجان الجونة وسخرتوا منها عشان ماكانش عاجبكم شكلها. واتريقتوا عليها ودمرتولها نفسيتها لمجرد انها مش شبه امها .. لدرجة انها حلفت ما تطلعش في مهرجانات تاني من ساعتها .. ولا نسيتوا؟ كومنتاتكم وجرحكم ليها وسخريتكم منها وألفاظكم النبيلة لسة موجودة على الفيسبوك على فكرة.

وممكن أحكيلكم مين اللي ضحك على “ياسمين” ووالدتها وأقنعهم انها تعمل قسطرة تكميلية في المستشفى بتاعتها .. بدل الجراحة التكميلية اللي الدكتور الإسباني رفض يعملها عشان مايحصلش مضاعفات واحتمال وفاة .. وحذرها من القسطرة وأنا وزين حذرناها وللأسف عملتها من ورا ضهرنا.

وتابع “خضر محمد خضر”: وممكن احكيلكم على كل حاجة كل اللي نفسكم تعرفوه، بس بشرط .. كل واحد فيكم يحكيلنا الأول عن أسرار بيته. والخبايا اللي ماحدش ينفع يعرفها وعلاقتكم كأسرة وعلاقتكم كأزواج ومين عمل إيه بالتفصيل ومين راح فين وعلاقتكم الصحية. ومشاكلكم النفسية وأسماء الدكاترة اللي بيعالجوكم والأدوية اللي بتاخدوها ومين طلق مين وليه ومين اتجوز مين وليه وامتى”.

خضر محمد خضر: علاقتي بياسمين تحولت إلى صداقة وشقيقين

وأوضح “خضر محمد خضر” أن علاقته بـ “ياسمين” لم تنتهِ بانفصالهما، مؤكدًا أن التواصل بينهما استمر بصورة طبيعية بعد الطلاق. وأن طبيعة العلاقة بينهما تغيرت من زوجين إلى أفراد من عائلة واحدة.

وتابع “خضر محمد خضر” قائلاً: “اللي مستعد يحكي أسرار بيته بالتفصيل على الملاء أنا هحكيله أسرار بيوتنا بالتفصيل .. يا إما خليكم في حالكم وسيبوا الناس في حالها .. احنا لا علينا دين لحد ولا مطالبين نحكي أسرارنا لحد. ومن يوم طلاقنا وانا تحولت من زوج ياسمين لأخوها الثالث مش طليقها .. وتحولت ياسمين من زوجتي لأختي التانية مش طليقتي … وغلاوتها في قلبي هتفضل زي غلاوة ندى اختي لآخر يوم في عمري”.

خضر محمد خضر يطالب بوقف الجدل حول وفاة ياسمين أبو النجا

واعتبر المخرج أن تفاصيل حياتهما الخاصة قد تبدو غير قابلة للتصديق بالنسبة للبعض، لكنه شدد على أن ما جمعهما كان مختلفًا. مطالبًا الجمهور بالتوقف عن تداول تفاصيل حياتهما وإثارة الجدل حول وفاة “ياسمين”.

وأضاف “خضر محمد خضر”: “خيال علمي بالنسبة لكم؟ معلهش، احنا كنا اسرة خيال علمي، ادعوا لياسمين بالرحمة والمغفرة. وادعوا لبنتها ولأهلها بالصبر والقوة، وياريت كفاية ترندات وقرف وسيبونا في حالنا بجد”.

وفاة ياسمين سيف أبو النجا بعد أزمة قلبية مفاجئة

وكانت “ياسمين سيف أبو النجا” قد رحلت عن عالمنا يوم 30 أغسطس، عقب تعرضها لأزمة قلبية مفاجئة، لتتصدر أخبار وفاتها مواقع التواصل الاجتماعي. وسط تفاعل واسع وطرح العديد من التساؤلات حول حياتها الشخصية وعلاقتها بطليقها “خضر محمد خضر”.