شهيرة تكشف كواليس قرار ارتداء الحجاب مفيش حد من الشيوخ كلمني

كشفت الفنانة “شهيرة” تفاصيل القرار الذي اتخذته قبل سنوات بارتداء الحجاب والابتعاد عن العمل الفني، مؤكدة أن القرار جاء بشكل شخصي. ودون تدخل من أحد، نافية ما تردد حول تلقيها اتصالات من شيوخ لإقناعها بالحجاب.

شهيرة عن سبب ارتداءها الحجاب: فجأة لقيت نفسي عايزة أبعد وأركز مع ربنا

وخلال ظهورها في برنامج “الصورة مع لميس” الذي تقدمه الإعلامية “لميس الحديدي”، استعادت “شهيرة” اللحظات التي سبقت اتخاذها القرار. موضحة أن الأمر بدأ أثناء حديثها مع زوجها الفنان الراحل “محمود ياسين” حول عمل فني جديد.

وقالت “شهيرة”: “قبل ما أقرر إني أتحجب كنت قاعدة مع محمود ياسين في البلكونة وبكلمه عن مسلسل جديد. تاني يوم الصبح كان الجمعة وكنت بقرأ سورة “الحج” لقيت نفسي بعيط جامد وفجأة لقيت نفسي عايزة أبعد وأركز مع ربنا. وابقى قريبة أكتر وأزود الطاعات”.

ونفت “شهيرة” أن يكون أحد رجال الدين قد تواصل معها لدفعها إلى ارتداء الحجاب، قائلة: “مفيش حد من الشيوخ كلمني. وشفت الشيخ الشعراوي بعد ما اتحجبت”.

كيف استقبل محمود ياسين قرار شهيرة؟

وتطرقت الفنانة “شهيرة” إلى رد فعل زوجها الراحل الفنان “محمود ياسين” عندما أبلغته بقرارها، موضحة أنها أخبرته بشكل مفاجئ. ليؤكد لها دعمه الكامل لاختيارها.

وروت ما حدث قائلة: “هو كان في مكتبه في الدور اللي فوق في الفيلا، جبت الدادة وقلتلها زغرطي، نزل محمود يشوف في إيه. قلت له أنا خلاص هقعد واتحجب أنا عايزة يبقى أنيسي ربنا، أخدني في حضنه وحاول يفهم سبب القرار. قلت له أنا عايزة أبطل دلوقتي مش عايزة حاجة تشغلني، الشغل بياخد تفكيري ده صلواتي بعملها بسرعة. قالي خلاص اللي انتي عايزاه اللي يريحك أعمليه”.

وأكدت “شهيرة” أنها لم تشعر بالتردد تجاه قرارها طوال 28 عامًا، قبل أن تبدأ لاحقًا في التفكير في العودة إلى الفن من جديد. خاصة بعد رحيل زوجها.

وقالت: “لم يحدث لي تأرجح لمدة 28 سنة، لما كبرت ومحمود حبيبي مش معايا بدأت أفكر مش في مهنتي في هوايتي. مستعدة أرجع أمثل لكن الحاجات اللي اتعرضت عليا منهم عملين في رمضان اللي فات بس محستش أن ده الرجوع بعد 28 سنة”.

شهيرة: أنا ست محتشمة

وفي حديث آخر خلال اللقاء نفسه، أوضحت “شهيرة” أن إطلالتها الحالية لا تصفها باعتبارها محجبة، وإنما ترى نفسها امرأة محتشمة. مشيرة إلى أن ارتداء غطاء الرأس ليس المعيار الوحيد للدين.

وقالت: “أنا قعدت 28 سنة محجبة، لما كبرت طلعت “القوصة” لسه مظهرتش بشعري، أنا مش محجبة لأن ده مش الحجاب أنا ست محتشمة. أنا لسه معنديش الجرأة بقالي 28 سنة مغطية شعري مش واخدة على إني أبقى فجأة من غيره. أنا كبرت ومفيش فتنة مش هكسر الدنيا بشعري، والإيشارب مش هو الدين”.

كما انتقدت “شهيرة” بعض التعليقات التي تتعرض لها عبر مواقع التواصل الاجتماعي. معتبرة أن الاهتمام بالأخلاق يجب أن يكون أكبر من التركيز على المظهر.

وأضافت: “الأخلاق أهم حاجة اللي إحنا بنفتقدها دلوقتي، شوفوا السوشيال ميديا عشان “القوصة” اللي بتبان دي لازم ينصحوني. ويقولولي حاجات ويتطاولوا عليا وعلى الفنانين بشكل عام، مش فاهمة إحنا بنعملهم إيه علشان كل التطاول ده”.

وأردفت قائلة: “الدين هو الأخلاق الرسول عليه الصلاة والسلام لما اتكلم عن البعثة بتاعته مقالش ربنا بعتني عشان أقولكم ازاي تصلوا. ولا تحجوا ولا تصوموا ولا تحطوا طرحة، إنما بعثت لأتمم مكارم الأخلاق”.

هل تعود شهيرة إلى التمثيل؟

وبشأن إمكانية استئناف نشاطها الفني بعد غياب طويل، أكدت “شهيرة” أنها لا تمانع العودة إلى التمثيل، خاصة أنها بدأت تنظر إلى الفن باعتباره هواية. لكنها لم تجد حتى الآن المشروع الذي ترى أنه يمثل عودة مناسبة لها بعد 28 عامًا من الابتعاد.

وأوضحت: “لما كبرت ومحمود حبيبي مش معايا بدأت أفكر مش في مهنتي في هوايتي، مستعدة أرجع أمثل لكن الحاجات اللي اتعرضت عليا. منهم عملين في رمضان اللي فات بس محستش أن ده الرجوع بعد 28 سنة”.