أحمد زاهر يفتح قلبه ويتحدث عن أصعب فترات حياته وتفكيره في الاعتزال

حل الفنان والنجم المصري “أحمد زاهر” ضيفًا على برنامج “منا وفينا” من تقديم الإعلامية “هبة حيدري” والذي يعرض عبر شاشة قناة “المشهد”.

أحمد زاهر عن دعم زوجته له: هي أحلى حاجة في حياتي ولما أكون هبوظ الدنيا في حاجة تهديني

حيث تحدث “زاهر” عن الكثير من الصعوبات التي واجهها خلال حياته، مشيرًا إلى أن زوجته “هدى” لها دور كبير في كل نجاح وصل إليه. وتذكر فترة صعبة فكر فيها في الاعتزال وهي ساعدته لتخطي هذه الفترة.

وقال “أحمد زاهر” خلال لقاؤه: “هدى أحلى حاجة في حياتي يعني أي حاجة حصلت لي في حياتي. لما أكون عصبي جدًا وهبوظ الدنيا في حاجة تهديني، من كام سنة كدة كنت أنا بصور فيلم اسمه “زنزانة 7″، أكشن. في الفترة دي تامر حسني صاحبي جدًا كلمني وقال لي يا زيزو ما تيجي تقدم الحفلة بتاعتي فقلت له طبعًا”.

وتابع “أحمد زاهر” قائلاً: “رحت وقدمت الحفلة ومأخدتش بالي أن في فتحة في المسرح، ولما طلعت اتخضيت من جمهور تامر. بسم الله ما شاء الله، الله أكبر، ناس كتير قوي فانا اتخضيت إحنا لما بشوف جمهور مثلاً في المسرح بيبقى 1000. ده أكبر مسرح أنا شايف آلاف عيني مش عارفة تجيب آخر الناس وماشي مش واخد بالي وكان في مربع كده مفتوح. تقريبًا تامر هيطلع منه وأنا بقدم رحت واقع فطبعًا كان في مسافة فكعبي اتكسر الحتة اللي ماسكه وتر اكيلس. مش قادر أوصف الألم كان ازاي وقتها وطلعت وكملت وقدمت الحفل”.

أحمد زاهر: فكرت في الاعتزال بعد ما وقعت على المسرح في حفلة تامر حسني

واستكمل “أحمد زاهر”: “بعدها طلعت جري على المستشفى وهو خلص يا حبيبي حفلته وجالي على طول على المستشفى هو وبسمة. وقعدوا معايا لأن كانت صعبه قوي، أنا كنت عارف أن الحاجات دي ممكن تخلي الواحد يمشي بزكة طول حياته. أو يبقى في رجل أقصر من رجل أو حاجه زي كده، وأنا طبعًا خدت مسامير وشرايح وعملية يعني ضخمة. وعندي فيلم بيتصور وقعدت 8 شهور في الجبس وحوالي 8 شهور تانيين علاج طبيعي”.

وأضاف قائلاً: “في لحظة قلت لهدى أنا لو حصل حاجة في رجلي وما بقتش أمشي طبيعي هبطل تمثيل. لأن هتجاب بقى في دور لما يبقى عندك كراكتر عنده عاهة مش هبقى ممثل بقى فهبقى بمشي وأنا بزك. مش هحب أشوف نفسي يعني وهتبقى تريقة على السوشيال ميديا الناس اللي ما بتسيبش حد في حالة”.

أحمد زاهر: أعلى ساعات النشوة اللي بحس بيها لما كاميرا بتصورني

وتابع: “فقلت لها لا مش هقدر وأنا بحب التمثيل قوي أنا التمثيل بالنسبة لي مش نجومية ولا شهرة ولا فلوس. ولا الكلام ده خالص أنا أعلى ساعات النشوة اللي بحس بيها في حياتي لما بكون كاميرا بتصورني وإضاءة في وشي. وأنا متقمص شخصية غير شخصيتي وبعمل مشهد حلو، ممكن بالنسبة لحد تاني بيتفرج علينا إيه التفاهة اللي بيقولها دي. بس يعني براحتكم بس أنا ده احساسي وده اللي أنا بحبه”.

وعن استعداده لأدواره قال “أحمد زاهر”: “بتعب قوي في الدور عمري في حياتي ما مثلت دور كده اللي هو يلا بينا. لما دور ده لازم مذاكرة وازاي هغير وازاي هعمل ولو في جانب نفسي اروح لدكتور، هدى دايمًا معايا وبتدعمني. واي نجاح هي سببه”.

وتطرق “أحمد زاهر” خلال حديثه إلى أصعب فترة مر بها في حياته وهي فترة مرضه، حيث قال: “جالي مرض في الغدة. وكنت في حالة صعبة أوي وباخد دواء مدى الحياة، بنتي نور الصغيرة اكتشفت أن جالها الغدة الدرقية لأني خلفتها بعد المرض. أنا كنت بموت وبلوم نفسي لأن أنا السبب، هو كله قدر ولكن إحساسي أنا اللي ورثتها المرض بيوجعني أوي”.

أحمد زاهر يتحدث عن مرض ابنته نور: بقفل على نفسي الأوضة وبنهار

وتابع متحدثًا عن الأعراض التي تتعرض لها ابنته حيث قال: “الأعراض المشتركة بيني وبينها أول حاجة زيادة الوزن. أنا وزني كان وصل لـ 185 كيلو، وهي عندها وزن زايد بسبب المرض، ولما تيجي تعيط بتتخنق وصوتها بيروح وبتوجع قلبي. وكل ما أشوف ده أقول أنا السبب وأدخل الأوضة أقفل على نفسي وأنهار لأن فعلاً أنا السبب. يعني أنا لو ما كانش جت الغدة قبل ما أخلفها ما كانتش جت لها”.

وأضاف “أحمد زاهر قائلاً: “بوديها لدكاترة وبشوف الأدوية ولما لقيت الأدوية مش بتعمل حاجة بروح لدكتور تاني وبدأت تخس شوية”.

وحكى “أحمد زاهر” عن الأعراض التي كان يشعر بها وقت مرضه وصعوبة ما مر به قائلاً: “أنا كان بيجلي عرض غريب. أبقى قاعد بتكلم عادي وفجأة أنام واتقلبت مرة بالعربية لأني نمت، أنام لمدة 10 دقايق أو ربع ساعة. ولما تصحيني أرجع أرد على آخر سؤال اتقال وبنسى أني نمت، بس الحمد لله دلوقتي لأ مش بتجيلي الأعراض دي”.