عمر كمال ماسرقتش الألبوم محمد فؤاد هو اللي ضحى بيه وانا مخدتش ولا قرش

تحدث الفنان الشاب “عمر كمال” عن تفاصيل أزمته بسبب تسجيل ألبومه الجديد الذي يشوق جمهوره له منذ فترة.

عمر كمال يكشف تفاصيل أزمته بسبب ألبومه الجديد

حيث كشف “عمر كمال” عن كواليس تصوير الكليبات وتسجيل أغنيات الألبوم مشيرًا إلى أن الألبوم في الأصل كان للفنان “محمد فؤاد”. وأنه لم يكن يعرف تلك المعلومة قبل التسجيل.

وقال “عمر كمال” في تصريحات له مع برنامج “إي تي بالعربي”: “الألبوم كان بتاع محمد فؤاد، لما جالي وبدأت اشتغل فيه. مكنتش أعرف في الأول عرفت بعد ما سجلت كذا أغنية، منطتش على الألبوم أو سرقته الأستاذ محمد فؤاد هو اللي رفضه. وهو اللي عمل مشكلة مع المنتج وضحى بكل الأسماء والأغاني الحلوة”.

عمر كمال: الألبوم اتعرض على وائل جسار وهيثم شاكر وانا عامل الألبوم بدون أي مقابل

وتابع قائلاً: “لما سألت عن قصة الألبوم اتقال لي أنه اتعرض على وائل جسار وهيثم شاكر وبسبب المقابل المادي حصل اختلاف. في منهم واحد طلب في الأغنية 50 ألف دولار كأداء صوتي يعني ما يقرب من 30 مليون جنيه مصري في الشريط الـ 12 أغنية. في مطرب تاني طلب حوالي 30 ألف دولار يعني مليون ونص في الأغنية مثلاً غير اللي المنتج صرفه وعمله. ولسه هيعمله من دعاية وتصوير يعني عايز 15 مليون جنيه في إيده بس عشان يغني”.

واستكمل “عمر كمال” حديثه مؤكدًا أنه لم يتلق أي أجر عن غناؤه ذلك الألبوم حيث قال: “الألبوم متكلف أكتر بكتير. من 15 مليون جنيه مصري، إحنا مصورين 12 كليب وعملنا حوالي 18 أغنية أو 20 طبعًا معدي بكتير جدًا. ده رقم قليل مش أقل من 20 مليون جنيه، لما قعدت مع صناع الألبوم قلت لهم مش هاخد ولا قرش. أنا نفسي أغني للناس دي وأعمل الألبوم ده أنا عامل الألبوم ده بدون أي مقابل عامله بحب”.

عمر كمال عن محمد فؤاد: مكلمتوش هو أكيد زعلان مني وأنا باعاتبه كواحد من جمهوره

وعن علاقته بالفنان الكبير “محمد فؤاد” أوضح النجم “عمر كمال” أنه لم يتواصل معه بعد بداية عمله على الألبوم. إلا أنه يعاتبه كواحد من جمهوره وليس كزميل على غيابه عن الساحة الفنية منذ فترة طويلة، وقال “كمال”: “مكلمتوش. عشان هو أكيد هيكون متضايق مني وزعلان بس كانت في ايدك كان بتاعك أنا زعلان منه وجمهوره زعلان منه. بعيد عن عمر المطرب، هو عارف كويس جدًا إني كنت من 22 سنة بقف قدام مكتبه واستناه وكان بيعمل حفله. كل سنة في “دريم بارك” الساعة 9 بالليل أروح من الساعة 11 الصبح حاطط البوستر بتاعه فوق راسي مستنيه 11 ساعة. عشان بس أسلم أو إيدي تلمسه”.

عمر كمال: حتة فؤاد فاضية وليه عمر مايكونش فؤاد جديد

وأكمل “عمر كمال” حديثه قائلاً: “لو بيشبهوني بمحمد فؤاد أو أنا تلميذ فؤاد الشاطر، حتة فؤاد فاضية وفي جمهور كبير تايه. ومحتاج اللون ده هو طول عمره ليه هوية وابن بلد وكان صوت مصر الهوية بتاعته ولونه كان محبوب من كل الناس. ومفيش حد بيقدم دلوقتي شكل الدراما اللي كان بيقدمها ولا شكل أغاني الحب اللي كان بيعملها هما بيقولوا السكة دي فاضية. وليه عمر ميكونش فؤاد جديد مش عيب”.