أول تعليق من شيرين عبد الوهاب بعد إطلاق أغنيتها الجديدة كان لازم أقول الكلام ده عشان اقدر اكمل

علقت الفنانة والنجمة الكبيرة “شيرين عبد الوهاب” أخيرًا على الأزمة التي مرت بها من خلال مداخلة هاتفية أجرتها مع الإعلامي “عمرو أديب”. في برنامجه الحكاية تحدثت خلالها عن عودتها بعد غياب وكيف استطاعت الخروج من الأزمة.

شيرين عبد الوهاب تكشف كواليس عودتها ودور توما وعزيز الشافعي في القصة

كما علقت على كلمات أغنيتها الجديدة “الحضن شوك” حيث تحدثت عن لحظات تسجيل الأغنية قائلة: “عزيز وتوما خدوني وسمعوني أغنية. ودي كانت قديمة مش جديدة، عزيز الشافعي عامل زي الدادا، بياخدني من البيت ويرجعني البيت، صحاب وحبايب وأخوات. ودايمًا بقول له انت عزيز عيني، وتوما فاتح لي بيته وجربنا غنينا غنوتين، والتانية هتعجبكم أكتر بكتير عشان هي فرحانة. الكلام ده كنت عايزة أقوله عشان اقدر اكمل، عشان لو فضل جوايا هيفضل كاسرني ودابحني. فقولت أقوله عشان الناس تسمعني واتكلم بقول ايه، بس أنا بومب مايتخفش عليا”.

وتابعت “شيرين عبد الوهاب” قائلة: “لحظة دخولي الاستوديو ايدي كانت متلجة ونبضات قلبي زيادة، لأنها حاجات نفسية بتؤدي لحاجات عضوية. لما بتكون لسه محتاج تأهيل، واقفة أمام المايك بغني ودني صفرت ومش سامعة حاجة، وبصيت لقيت نفسي مغمضة عيني خالص. وغنيت الأغنية كلها وانا مغمضة عينيا، لأني لو فتحت في حاجة هتشتتني، وأنا دلوقتي حساسة جدًا. يعني لو قولت لي صباح الخير بصوت عالي أو طريقة حادة ممكن اقعد طول اليوم بعيط، بس انا حلوة بيكم وليكم وعشانكم”.

شيرين عبد الوهاب تتحدث عن لحظات عودتها للتسجيل: كنت زي حد بيتولد من جديد

وتحدثت “شيرين عبد الوهاب” خلال مداخلتها عن عودتها للغناء والحالة التي مرت بها قائلة: “أنا بشتغل. الفترة اللي فاتت كانت زي حد بيتولد من جديد، فكنت محتاجة أكون في بيئة هادية مافيهاش أخبار، كنت زي في منتجع. واتعالجت من حاجات كتير كانت تعباني ومكسراني ودبحاني، بس الحمد لله وبفضل رب العالمين ودعواتكم ليا، مافيش إنسان محظوظ قدي. أنا عندي جمهور بيدعي لي كأني واحدة من بناتهم ومن أسرتهم، من دمهم، وأنا بقول لهم، أنتم دمي وروحي. وكل حاجة حلوة بتوقفني على رجلي بعد ربنا سبحانه وتعالى. أنا مش عارفة أقول لك ايه غير إني سعيدة أكتر بأن أنا النهاردة هنام وأنا مش خايفة ولا قلقانة ومدفية بحب الناس. زي ما بتدفى دايمًا بحضنهم، والنهاردة بالذات محتاجة منهم انهم يسمعوني”.

شيرين عبد الوهاب تكشف سبب عودتها في هذا التوقيت

وعن هذا التوقيت بالتحديد، كشفت “شيرين عبد الوهاب” عن السبب الذي شجعها على العودة حيث قالت: “اللي رجعني، المشهد العالمي اللي في فيلم تايتنك، لما حد بيحط حد على لوح خشب ويموت هو بس التاني بيفضل. لأن درجة الحرارة في البحر، انا جاية من هنا ومسكت الصفارة وناديت على القارب اللي هيجي ياخدني عشان أقول له إني لسه ماموتش. وإن أنا لسه عايزة اعيش وانجح، ده الترجمة الحقيقية اللي جاية منه، جاية من كل كلام لذيذ وحلو فيه دعم ليا. ولما لقيت الدنيا كلها خايفين عليا وبيقولوا لي “مش دلوقتي”، انا عنيدة جدًا، وقولت “لأ دلوقتي”، وزي ما انا هطلع. مفيش حاجة تعيبني في شكلي، ممكن أكون زدت شوية، والكلام الفاضي ده، أنا بغني بروحي وجسمي وقلبي ومشاعري .. عاوزة الناس بس تسمعني .. مش عاوزة حاجة تاني، غير إني احس أن صوتي في بيوتهم وعربياتهم وتليفوناتهم”.

جديد شيرين عبد الوهاب عقب العودة بعد الغياب

أما عن جديدها، قالت “شيرين عبد الوهاب”: “قد الغياب في حضور، كل أسبوعين هنزل أغنية لحد ما الصيف يخلص. واحشني الغنا أوي، الغنا هي الحياة والمياة اللي بشربها والهوا اللي بتنفسه. دار بيني وبين ستات اصحابي بيقولوا لو معنا فلوس كتير اوي هنقعد في البيت، قالوا لي وانتي؟. قولت لهم ومين قال لكم إن أنا لو معايا فلوس كتير هقعد، قولت لهم هو الغنا بالنسبة لي شغل؟ ده حياة، ده كيان”.

يذكر أن شركة “سوني ميوزك” الشرق الأوسط طرحت أحدث أغاني النجمة “شيرين عبد الوهاب” بعنوان “الحضن شوك” من كلمات وألحان “عزيز الشافعي”، وتوزيع “توما”.

وكانت “شيرين عبد الوهاب” قد تعاقدت مؤخرًا مع “ناصر بيجاتو” لتولي الإدارة الكاملة لأعمالها الفنية خلال المرحلة المقبلة. في عودة للتعاون بينهما بعد سنوات من النجاحات المشتركة..