هبة السيسي تتحدث عن تفاصيل رحلتها مع مرض السرطان وتكشف سبب عدم ارتداءها شعر مستعار

حلت الفنانة والإعلامية “هبة السيسي” ضيفة على برنامج “قعدة ستات” من تقديم الإعلامية “مروة صبري”. وكشفت خلال لقاءها عن السبب الأساسي وراء رفضها الظهور بشعر مستعار “باروكة” بالرغم من تساقط شعرها بسبب جرعات العلاج الكيماوي. التي تحصل عليها بسبب إصابتها بمرض السرطان.

هبة السيسي تكشف سبب عدم ارتداءها شعر مستعار

وتحدثت “هبة السيسي” خلال لقاءها عن المراحل التي مرت بها منذ إصابتها وبعد بدء تناول جرعات العلاج الكيماوي. حيث قالت: “بعد أسبوع من أول جلسة كيماوي شعري وقع فجأة مرة واحدة، في يوم بالليل شعري ابتدى يقع. خصل كبيرة كمية شعر كبيرة بتنزل، دخلت أخدت شاور شعري كله وقع من المايه وجالي انهيار عصبي. بشوف نظرات من النساء بتتخض لما تشوفني أو يبصوا باستغراب أو يتوشوشوا لما يشوفوني مش بيحترموا مشاعري”.

وتابعت قائلة: “رافضة ألبس باروكة عشان حسيت بمعاناة المريضات قررت أكون واجهة ليهم كلهم إني متكسفش من شكلي. مش هيهمني أي حد هاواجه الناس كفاية الألم والتعب اللي بمر بيه، مش هلبس باروكة عشان الشكل مش كل حاجة. إحنا كده كدة شكلنا بيتغير طول الوقت وهنكبر الجمال مش دايم اللي دايم السلام النفسي وروحنا”.

هبة السيسي: التجربة قاسية وكنت بزعل على نفسي وبقعد أعيط

وأضافت “هبة السيسي”: “أنا فخورة بنفسي بس عايزة الناس يحسوا بمريض السرطان لأن التجربة قاسية وصعبة. أنا واحدة من الناس وأنا برا دايرة مرضى السرطان مكنتش حاسة ولا فاهمة هما بيمروا بإيه، بيمروا بظروف صعبة واكتئاب. أنا إنسانة وعندي مشاعر بقعد أوقات كتير بزعل على نفسي وبكلم ربنا وأنا راضية بالابتلاء ده بس بقعد أقول يا رب خفف عني. وشيل عني وخرجني من الهم والكرب اللي أنا فيه، بقعد أعيط طول الوقت مش عشان متضايقة من شكلي أنا تعبانة”.

واستكملت حديثها مشيرة إلى قوة إرادتها وقرارها بالعودة إلى تقديم برنامجها التلفزيوني حيث قالت: “قدرت أرجع للبرنامج وأطلع للناس. بعد ما وصلت لمرحلة تقبل اللي أنا فيه، لما تقبلت إني خلاص مريضة ومرحلة وإن شاء الله تعدي وإني هانتصر على المرض. في اللحظة دي قررت أمارس حياتي الطبيعية عادي وهنزل شغلي، مش قادرة لسه أخرج في مكان عام عشان نظرات الناس. لسه خايفة من مواجهة الناس عشان لما يشوفوني ميتكلموش عني”.

هبة السيسي ترد على منتقديها بسبب عدم ارتداءها باروكة

وبالرغم من المعاناة التي تعانيها “هبة السيسي” مع المرض، إلا أن البعض اتهمها بالبحث عن التريند بسبب ظهورها بدون شعر مستعار. وقد ردت على تلك الاتهامات قائلة: “قالوا اني طالعة من غير باروكة عشان التريند، يعني أنا عشان أطلع تريند. أو اتشهر أو الناس تتكلم عليا جبت لنفسي المرض وأديت لنفسي كيماوي أنا مريضة سرطان وباخد كيماوي وهو ده وضعي الحالي. أتاجر بإيه يا جماعة عايزني أعمل إيه أقعد في البيت، أنا قررت إني مش هلبس باروكة عشان اللي زيي يبقى عندهم ثقة في نفسهم. وميتكسفوش من نفسهم، ويا جماعة متتكسفوش من حد عيشوا حياتكم”.

وكانت الإعلامية “هبة السيسي” قد كشفت عن إصابتها بالسرطان خلال إحدى حلقات برنامجها “ميس إيجيبت” الذي تقدمه عبر قناة “الشمس”. في أول ظهور لها بعد خضوعها لعملية جراحية حيث قالت: “النهاردة أول حلقة ليا بعد فترة صحية كانت صعبة جدًا. بعد إصابتي بالسرطان وعملت عملية كبيرة بس الحمد لله ربنا كرمني وعدت على خير”.

هبة السيسي لجمهورها: كلامكم وصلني ودعواتكم فرقت معايا

وتابعت “هبة السيسي” قائلة: “حابة أطمن كل الناس اللي سألوا عليا وقلقوا عليا ودعولي من قلبهم أنا الحمد لله بقيت كويسة. بس الفترة اللي فاتت خلتني أحس يعني إيه دعوة طالعة بصدق من القلب ويعني إيه في ناس حلوة وجميلة موجودة. واقفة في ضهري من غير مقابل، حابه أشكر كل الناس اللي سألت عليا سواء برسالة أو بمكالمة أو زيارة أو حتى دعوة. لأن دعواتكم فرقت معايا جدًا أنا كنت داخلة في موضوع كبير والحمد لله كلامكم الجميل وصلني وكان دعم ليا. في وقت بجد أنا كنت محتاجة الدعم وكنتوا فعلاً سند حقيقي ليا”.

واختتمت “هبة السيسي” حديثها قائلة: “النهادرة أنا راجعة بطاقة جديدة وحابة أقول لأي حد بيمر بتجربة صعبة أنتوا أقوى مما تتخيلوا. وربنا هيسخر لكم اللي يسندكم ويدعمكم ومفيش أقرب من ربنا في أي وجع شكرًا ليكم جدًا”.