بسنت شوقي تكشف عن عشقها لكرة القدم وتعلق على آخر حلقات صباحو تحدي

حلت الفنانة “بسنت شوقي” ضيفة على آخر حلقات برنامج “صباحو تحدي” الذي يقدمه الإعلامي “عمرو نصوحي”. حيث تحدثت عن عشقها لكرة القدم وهو السر الذي لا يعرفه الكثيرين عنها.

بسنت شوقي تحضر تصوير آخر حلقات سلسلة صباحو تحدي

ونشرت “شوقي” صورًا من الحلقة جمعتها بمقدم البرنامج “عمرو نصوحي” وفريق عمل البرنامج وأرفقتها بتعليق. قالت فيه: “النهاردة هاتكلم عن حاجة شخصية شوية، يمكن مش ناس كتير تعرفها عني، بس حابة أشاركها معاكم … أنا بحب كورة القدم جدًا وفان كبيرة اوى أوى لـ “صباحو تحدي”.

وتابعت قائلة: “حبى للكورة ابتدى من وأنا صغيرة أوى، أبويا مكنش بيفوت ماتش وأنا كنت بأقعد أتفرج معاه وحبيتها. أنا الوحيدة ما بين اخواتي اللي اتسحلت معاها، أول كراش في حياتي وأنا طفلة مكنش نجم سينما وكدة، لا كان روبرتو باچيو. كنت باقف جون مع الولاد في المدرسة، كانوا مسميني zambrotta عشان كنت أي يوم مفيهوش يونيفورم كنت بلبس تيشيرت إيطاليا. وكنت بأعشق وليد صلاح الدين وأيمن شوقي”.

بسنت شوقي تكشف ابتعادها عن كرة القدم بسبب أحداث بورسعيد

وأضافت “بسنت شوقي”: “فضلت كدة لحد بورسعيد، بعدها قفلت بكل أمانة وبقيت بس باترول (أسخر) على صحابي الزملكاوية وخلاص. لغاية من حوالى سنتين كدة، صاحبتي الأنتيم، كويرة زملكاوية كدة، كانت معايا في العربية قالتلي أنا بجد بحب نصوحي جداً. بنى آدم نضيف وسالك وحكيتلي على صباحو (هي مشافتش ولا حلقة) وعلى مرعى وكدة، والموضوع خلص”.

وتابعت “شوقي” قائلة: “روحت بليل، النور كان قاطع، قلت افتح أشوف على يوتيوب ايه الموضوع (أنا curious جدًا بطبعي)، وبس”.

وأكملت “بسنت شوقي” منشورها المطول قائلة: “شحنت باقة الإنترنت مرتين ليلتها، وطبقت على سيزون وخلصته وكلمتها تاني يوم. باحكيلها بقى على مين لذيذ ومين مثقف ومين الدوك ومين معرفش مين وعملت فولو لـ نصوحي ومرعى وبقيت نامبر وان فان للبرنامج … و لما بشوفهم الاتنين في أي حتة باقلب fan girl (معجبة) تمامًا.

بسنت شوقي: أنا وصلت متأخر عشان محدش يقول يقول وشي وحش وفقر

واستطرت “بسنت شوقي”: “عمرو عارف مشاعري دي وبعتلي قاللي لو فاضية أجي احضر تصوير آخر حلقة في “السيزون”. والحمد لله انى روحت، عشان لما وصلت عرفت انها الحلقة الأخيرة في السلسلة كلها، وعلى فكرة، أنا روحت متأخرة شوية. كان مرعى أصلاً خسران عشان محدش يقول وشى وحش وفقر، أنا زعلانة جدًا ان صباحو خلاص كدة. صباحو كان روتين عندي وانا باطبخ، وانا سايقة، يوم الجمعة الصبح، لما ببقى في موود وحش … بس حتى وهو بيخلص بيخلص بشقاوة 1 – 6، الرقم اللي بيضايق ده”.

بسنت شوقي: أنا مراعنة ماعدا آخر حلقة

واختتمت “بسنت شوقي” حديثها قائلة: “بس خير ان شاء الله أنا متأكدة ان عمرو هيرجع بحاجة احلى، هتوحشوني كلكم. صباحو ومرعى ورامز، وفخورة إني كنت من ضمن حضور آخر حلقات البرنامج، للناس اللي متابعة بقى، شوية fun facts (حقائق مسلية).

1- أنا مراعنة (إلا آخر حلقة بصراحة، من حق عمرو يكسبها عشان قناته برضه).

2- أحسن أداء فردى في رأيي حنفي وعرفي ويوسف عثمان وعادل سعد.

3- ألذ حلقة السنة دي حلقة چيمي وكيكس، وحبيت حلقة حنفي وصاوي اوى برضو بصراحة.