حازم إيهاب يتحدث عن معاناته مع طفله منذ ولادته وحتى الوفاة

تحدث الفنان الشاب “حازم إيهاب” عن معاناته مع طفله الرضيع منذ حمل والدته وحتى وفاته مرورًا بولادته التي اقترنت بالعديد من الصعوبات. وذلك خلال حلوله ضيفًا على بودكاست “فايق ورايق” الذي يقدمه الإعلامي “ابراهيم فايق”.

حازم إيهاب عن مصارحة الطبيبة بمرض طفله: قالت المعلومة بشكل مرعب

حيث قال “حازم إيهاب” خلال لقاءه: “الحمد لله عمري ما دخلت في الحتة إن كاره اللي حصل أو متضايق من اللي حصل بالعكس. بعد 4 شهور جواز ومكنش في شغل مراتي كانت حامل، قلت الولد بيجي برزقه، الدنيا كانت كويسة لحد الشهر الخامس. روحنا للدكتورة وشافت حاجة وهي مكنش عندها طريقة للتواصل صح قالت المعلومة بشكل مرعب، قالت “إحنا محتاجين نعمل فحص إيكو للقلب”.

وتابع قائلاً: “سألتها ليه قالت “خير”، “منة” مراتي قلقلت ومامتها، وعملنا “الإيكو” واكتشفنا أن فيه غرفة من غرف القلب مش شغالة. لغاية اللحظة دي معندناش مشكلة لأن الدم بينتشر في جسمه من قلب الأم مش من قلبه هو. حاولت إني اسحب الموضوع ناحيتي لأن كان في مكالمة بيني وبين ناس في أمريكا بلغوني بشكل رسمي أن في الحالة زي دي الموضوع مش بيكمل”.

حازم إيهاب يتحدث عن قراره حول إجهاض زوجته

وأضاف “حازم إيهاب”: “أنا بقيت بطمن “منة” مراتي وأن الموضوع هيظبط، مكنتش عارف أواجهها وأقولها. ده غير أن هي كان ممكن تتعرض للخطر، كلمت حد من الأزهر وسألته أعمل إيه، قالي أن مسموح أن ننزل الطفل. لكن لما بدأت اسأل لقيت أن في خطر على حياة “منة” مراتي فقلت لأ، وكان عندي مشكلة إني ابقى قاعد قعدة زي دي وأحكي. وهو خلصان في الشهر الخامس ولا السادس، كان هيطاردني كابوس طب ما أنت متعرفش ما ربنا كان ممكن يحط فيه معجزة. ربنا قادر على كل شيء”.

واستكمل “إيهاب” حديثه قائلاً: “بعد الولادة كانت أصعب بكتير أنا بشكر دكتور عبد الرحمن من مستشفى مجدي يعقوب. “يونس” عمل عملية بعد 6 ساعات من الولادة”.

وتابع: “منة” كانت فاكرة أن “يونس” في الحضانة في المستشفى اللي هي موجودة فيها، ومتعرفش أن هو راح مستشفى تانية خالص. عمل أول عملية محاولة يفتحوا الحتة دي وفعلاً فتحت والدكتور قالي أن دي خطوة مهمة”.

حازم إيهاب عن وفاة طفله: كانت صدمة وربنا يجعله شفيع لينا

وأضاف “إيهاب” موضحًا معاناته طوال تلك الفترة: “13 يوم وكانوا طوال جدًا عليا لأني مكنتش بنام، لكن مع الأسف كنا اتأخرنا. العضلة دي كانت لازم تشتغل قبل ما يتولد عشان تقدر تضخ الدم وتبقى قوية وهي مكنتش قوية. مع اليوم الـ 13 كان لازم يعمل عملية تانية، دخل عمل العملية دي وفضل قاعد فيها 4 ساعات وخرج الدكتور. وزي مشاهد الأفلام الدكتور قالي تعالى إحنا حاولنا لكن في آخر العملية كان بيدي بوادر أن هو مش هيكمل الجسم كان بينهار”.

واستكمل قائلاً: “كانت صدمة وربنا يجعله شفيعًا لينا، في الأول أنا كنت منهار وأنا كنت صدقت أن هو هيكون موجود وهحضر سريره. لكن الحمد لله انتهت الحدوتة بسرعة وده كرم من ربنا في ناس بتقعد أكتر”.

حازم إيهاب متحدثًا عن زوجته: ظهرت لي وسط الضلمة وماكنتش كويس نفسيًا

وأشار “حازم إيهاب” خلال حديثه إلى علاقته بزوجته “منة” حيث تحدث عن تأثيرها على حياته قائلاً: “ظهرت لي “منة” مراتي من وسط الضلمة. أنا اتجوزت وأنا عندي 24 سنة وكنت بعمل كل اللي في إيدي عشان اتجوز، هي تأثيرها عليا كان إيجابي. لما شفتها أنا كنت بني آدم مش كويس نفسيًا وتصرفاتي كان عندي مشاكل كتير جدًا، اتقفت معاها وقلت لها أنا في اللحظة دي معيش فلوس بس عايز أقابل مامتك، ودا كان بعد 7 أيام من لما شفتها أول مرة”.

وتابع “إيهاب” قائلاً: “بعد 10 أيام قابلت مامتها وقلت لها إني لا أملك شيء، أنا لو ربنا كرمني بكرا بحاجة هخطب بعد بكرا، ولو بعده كرمني بحاجة هتجوز بعد بكرة، وهي اعتبرتني زي ابنها”.

وحكى “إيهاب” عن الفترة التي تعرف بها على زوجته مشيرًا إلى أنه بدأ معها حياة جديدة. حيث قال: “لما شفت مراتي كان بعد 3 تجارب أسود من السواد، اتخانت مرتين ومرة اتسبت، كانت الدنيا بشعة”.

وتابع “حازم إيهاب”: “أنا دخلت المستشفى وحصلي مشكلة مزمنة في قلبي بسبب القصة دي، وصلت لمرحلة أن عندي حاجة اسمها عدم انتظام ضربات القلب”.

وأكمل قائلاً: “المرة اللي اتسبت فيها هي دي اللي دخلت فيها المستشفى، مرة اتخانت وفي النص اتسبت وبعدين اتخانت. أنا زي ما أكون باكل علقة، أول مرة اتخانت رد فعلي مكنتش متحكم في إحساسي وعصبي، كنت ساعتها صغير. وابتديت بقى شكلي حلو وعملت أسناني ورحت الجيم وكنت بالنسبة للجيل بتاعي يتهافت عليا القلوب، وحسيت أن ليه بيحصل فيا كده”.

يذكر أن حازم إيهاب شارك في رمضان 2025 بالجزء الثاني من مسلسل “أشغال شقة” وهو من بطولة “هشام ماجد”، “أسماء جلال”، “شيرين”، “سلوى محمد علي”، “مصطفى غريب”، وآخرين ومن تأليف “خالد” و “شيرين دياب”، وإخراج “خالد دياب”.