نهاد ابو القمصان عن حالة خاصة انتهاك شديد لقيم وأخلاق مهنة المحاماة

بالرغم من النجاح الهائل الذي يحققه مسلسل “حالة خاصة” والذي يقوم ببطولته النجم الشاب “طه دسوقي” كأول بطولة مطلقة له، إلا أن المسلسل لم ينجو من النقد اللاذع والذي وجهته له المحامية الشهيرة “نهاد أبو القمصان” حيث علقت على أحداث المسلسل وخاصة الحوار الذي يدور بين أبطاله خلال الأربعة حلقات الأولى.

كما انتقضت “أبو القمصان” بعض التفاصيل التي تعرض فريق عمل المسلسل للمسائلة مشيرة إلى دور نقابة المحاميين الذي يغيب عن المشهد، حيث نشرت “نهاد أبو القمصان” مقطع فيديو لها عبر منصة “تيك توك” متحدثة عن المسلسل.

وقالت خلال الفيديو: “جميل إن يكون في مسلسل بيتكلم عن وجود شاب عنده حالة خاصة بس المكتب دة عايز يتشمع بكل المحاميين اللي فيه، يعني أولاً ازاي نجيب صاحبة القضية ونقعدها مع كل المحاميين ومنهم المحاميين اللي تحت التمرين ونقولها قولي كل أسرارك قدام الكل ونقولها هما دول اللي هيحلولك القضية دة ضد مهنة المحاماة تمامًا مش في حاجة اسمها خصوصية ازاي اجيب موكل يتكلم عن أسراره قدام شباب لسة بيتعلموا ومتعينوش في المكتب ودة انتهاك شديد لقيم وأخلاق مهنة المحاماة”.

وتابعت حديثها قائلة: “ثانيًا خلع إيه اللي بيعملوله تحقيق، 6 بيحققوا في قضية خلع ويصوروا جوز الست ويقولولها هاتي كشف طبي، الكلام دة ممكن يكون بيطبق في انجلترا اللي فيها اقتسام للثروة فكل واحد بيثبت أن مش هو سبب الطلاق لكن الخلع عندنا الست بتتنازل عن أي حاجة ومش بنقول أسباب اصلاً أما التحقيقات دي في الطلاق للضرر.

واستكملت “أبو القمصان” في تصريحاتها خلال الفيديو: “مسلسل موضوع عائلي فيه مشكلة من ناحية أخلاقيات المهنة ومن ناحية الموضوعات المطروحة فهاتوا محامي يراجع المسلسل كمان الجناية اللي المتهم ممكن يأخذ فيها إعدام ولسة بنتناقش فيها وحد يديها برشامة فيها الحل قبل ما تترافع وتقولولي دي أكبر محامية في مصر وهي الصبح بتقول للمحاميين انتوا أكبر عقول وأكبر محاميين ومش عارفين توصلوا لحل”.

واستكملت: “وصاحبة المكتب قعدة مع ال 6 متدربين اللي لسة بتختبرهم مش حتى دول تحت التمرين والست أفراد معاهم قضية واحدة، ولا المحامي المتحرش هل في محامي ممكن يتجرأ على أستاذته ويتكلم معاها بالطريقة دي، حرام تدمروا ثقافة المجتمع القانونية دة إحنا بنقعد سنين نبني الوعي القانوني وكمان موكلة تيجي لمحامية تقولها أنا هربانة من البوليس فتكلم المباحث تسلمها هي فين نقابة المحاميين من الكلام دة”.

واختتمت “نهاد أبو القمصان” حديثها عن مسلسل “حالة خاصة” قائلة: “أنا اتفرجت على 4 حلقات وقلبي مش جايبني دة مفيش منظومة أخلاق ولا قواعد مهنية ولا قانون”.

يذكر أن مسلسل “حالة خاصة” بطولة الفنانة “غادة عادل” والنجم الشاب “طه دسوقي” ومجموعة من النجوم والنجمات ويعرض حاليًا على منصة واتش ات بواقع حلقتين كل أسبوع.