محمد رضوان حاسس اني لسة ممثلتش وعندي مشاريع كتيرة
حل الفنان الكبير “محمد رضوان” ضيفًا على الإعلامية “إسعاد يونس” في برنامجها “صاحبة السعادة” المذاع على على قناة “دي إم سي” حيث تطرق للحديث عن أعماله الفنية ومشواره منذ بدايته فأوضح أن مشاركته في مسلسل “يوميات ونيس” الجزء الخامس من خلال شخصية “حلقوم كان مصادفة وأن من قام بترشيحه هو الفنان الكبير الأستاذ “محمد صبحي”.
فقال “رضوان” خلال لقاءه: “كنا في المرحلة اللي الأستاذ محمد صبحي والأستاذ لينين الرملي مكنوش على وفاق وهو كان بيعمل مسرحية “ماما أمريكا” في مسرح قصر النيل وأنا معدي بالصدفة ولقيت زمايلنا بتوع الديكور وقالولي خش سلم على الأستاذ وقالي أنت بتعمل إيه دلوقتي قلتله أنا في المسرح القومي بس حاليًا مش بشتغل قالي طيب أنا عايزك علشان هعمل مهرجان المسرح للجميع”.
واستكمل “رضوان”: “بعد أسبوع لقيته باعتلي دور حلقوم وهو كان في الجزء الخامس من يوميات ونيس وكان عايز يتجوز واحدة من اخوات زكريا وهو شخص موظف وبيقبض 150 جنيه في الشهر ومش معاه أي فلوس علشان يتجوز بس عايز يتجوز ويعيش حياته، هو كان قاتم شوية ومش بيحب لا المزيكا ولا الشربات وكل ما تقوله حاجة يقولها همشي والشخصية كانت واخدة الكوميديا من الجدية وفضلت الشخصية لغاية آخر الأجزاء”.
وشارك “رضوان” أيضًا في العديد من الأدوار الأخرى في عدة مسلسلات ناجحة مثل “هذا المساء”، “بدون ذكر أسماء”، “أبو العروسة” وغيرها، وقال عن مشاركاته: “مسلسل بدون ذكر اسماء كان مسلسل كويس جدًا وكنت عامل شخصية الشيخ رشوان مع وليد فواز، وبعد كدة تامر محسن كلمني علشان مسلسل هذا المساء وقالي الدور مش كبير بس مهم في الأحداث”.
وتابع: “يمكن ربنا يكون عايز اني اتعرف بشكلي الحالي بعد ما كبرت والناس حابة التركيبة دي دلوقتي لأنه بيمثل الأب في كل أسرة”.
شارك “رضوان” أيضًا في مسلسل “موضوع عائلي” مع النجم الكبير “ماجد الكدواني” وقال عن ترشيحه لشخصية “رمضان حريقة”: “دوري في موضوع عائلي هو طبطبة من ربنا عليا، كان في ممثل تاني كان هيعمله بس اختلف معاهم في وجهات النظر أو على الأجر مش عارف”.
وتابع: “لقيت المخرج أحمد الجندي طالب يقابلني وانا مكنتش قابلته قبل كدة وقعدنا نتكلم كتير في مواضيع مختلفة ورأيه في الحاجات اللي شافهالي ورأي في الحاجات اللي أنا شوفتهاله ووجهات نظرنا في الكوميديا وفي الآخر قالي خلاص هتعمل معايا الدور”.
وأضاف: “هو بيعمل حاجة جميلة وهي أننا بنقرى المشاهد وبنعمل بروفات الترابيزة جوة الديكور اللي هنصور فيه فبنبقى تعايشنا مع مكان التصوير وسماء ابراهيم من أول لحظة كنت مصدق أنها زينب مراتي والولاد ولادي ودة بيتنا”.
واستكمل “رضوان” قائلاً: “وأحمد الجندي من الناس السهلة وحتى لو الشخصية مفيش حوار ليها في مشهد يقولي مش مشكلة اتكلم وماجد الكدواني معندوش مشكلة في أن شخصية تضحك في المسلسل هو ممثل بيعمل دوره وملوش دعوة بغيره وكل حاجة كانت ماشية تبع الأصول والأعراف الفنية المحترمة”.
واختتم حديثه قائلاً: “الناس كانوا شايفين أن موضوع عائلي ايقونة وانا شايفه فاتحة الخير عليا في كل حاجة والكل بقى بيطلبني في شغل معاهم علشان بقيت محبوب، حاسس اني لسة ممثلتش وعندي مشاريع كتيرة عايز اعملها وأدوار نفسي امثلها”.
يذكر أن مسلسل “موضوع عائلي” بطولة “ماجد الكدواني”، “محمد رضوان”، “رنا رئيس”، “طه دسوقي”، “سماء إبراهيم”، “محمد شاهين” وغيرهم نخبة من النجوم، والمسلسل من تأليف وإخراج “أحمد الجندي”.
