حرب كلامية بين أيمن بهجت قمر ومحمد رحيم

وقعت بين الشاعر الغنائي والسيناريست أيمن بهجت قمر، والملحن والفنان محمد رحيم، حالة من الشد والجذب وصلت إلى حد التراشق بالكلام، وذلك عبر مواقع التواصل الاجتماعي.

بدأ الخلاف بعدما نشر الملحن والمغني الشاب شريف بدر عبر حسابه على Facebook أنه تعرض للسب من قبل محمد رحيم، بسبب رأيه في الساحة الفنية حاليا والتي قال إنها تشهد تراجعا في مستوى التلحين.

هذا الموقف دفع الشاعر أيمن بهجت قمر لمهاجمة رحيم على الملأ، معلنا رفضه إرهاب رحيم للملحنين الشباب.

وكتب أيمن يقول: وبعدين يا رحيم! مرة عمرو مصطفى ومرة وليد سعد ومرة الملحن الشاب شريف بدر! هو أنت مالك يا رحيم؟ من بعد أغنية مشاعر وانتخابات الجمعية اللي ترشحت فيها ولم توفق وأنت لا تفعل شيء غير خناقات مع شيرين ونانسي ونازل تنظير في زملائك الملحنين، وطول الوقت شايف نفسك أحسن ملحن في مصر وانك السورس، اللي بيقول على نفسه جامد بيبقى مش جامد ولا حاجة أو عايز يخلي الناس تفضل تاخد بالها انه جامد وبيفكرها انه جامد؟..

وأضاف: طب والله العظيم يا رحيم أنت مش أحسن ملحن ولا حاجه والله العظيم بقالك فترة مش مركز وخفيف وأنا عن نفسي عمري ما ركزت معاك ولو كنت شايف انك أجمد واحد فعلا كنت اشتغلت اكتر معاك..

ولم يكتف بذلك، بل قال أيضا: أنا يمكن مارضيتش أتكلم ساعة عمرو ووليد عشان هما يقدروا يردوا وعندهم اللي يرد، بجد عيب عليك تصغر نفسك كل شوية وبصراحة أخلاق شريف كبرته في نظرنا كلنا وشكرا..

بدوره، لم يسكت رحيم على هجوم أيمن بهجت قمر، وأكد لمتابعيه جودة أعماله الفنية التي طرحها مؤخرا والتي كتب كلماتها بنفسه إلى جانب تلحينها، ليؤكد أن كتابة الأغاني ليست بالعمل الصعب، وأشاد بعدد من الشعراء لم يذكر اسم أيمن بهجت قمر بينهم، ليتجاهله.

وقال رحيم: سوري يا جماعة والله الحمد لله أنا عارف من زمان أن أنا بلحن كويس خلاص دي عرفناها بس أنا فعلا فجأة والله من غير ما أقصد اكتشفت أني في الفترة القليلة اللي فاتت كتبت لنجوم مهمين أوي زي تامر حسني “رسمي فهمي نظمي” و”زي النهارده” لخالد سليم واليسا “في عيونك” ونوال “صوت الهدوء” وحماقي “ياللي زعلان” وسميرة ‫”سيرة الحب‬” والله من غير ما أقصد واكتشفت أن الحاجات دي عجبت الناس قوي غير إني عامل للهضبة غنوة في الجديد برضه كلماااااتي جنب الهيتايه الرئيسية، إيه ده أنا مكنتش اعرف أن كلماااااتي بتعجب الناس اوي كده والنجوم بيتهافتوا عليها أما يا واد يا مصيلحي دي شغلانة الشاعر دي حلوه جوي جوي دي حاجه سهله خالص خالص ياللا بقا طالما مشيت مع الواحد كده يبقى نكتر منها شويه اهه الواحد يجيب سجايره..

وأضاف: أما طبعا الأغاني اللي بجد نعملها مع أرباب الشعر هو في ياد يا مصيلحي بعد خالك الأبنودي دا اللي ياد كانوا بيجولوا عليه أنه بيخترع تفعيلات وجوافي ويشتغل من بحور الخليل ابن احمد الفراهيدي اللي أسس عروض الشعر ذات نفسه مكتبهاش في كتبه غير طبعا بجيت الشعراء التانيين اللي كلماتهم عامله زي العسل النحل زي الواد ابن مرزوق والواد محمود ابن صلاح والواد أمير ابن طعيمة والواد على خلاف والواد باسم عادل ومؤمن ومصطفى حسن والغنيمي وحامد وابن منير وابن امين وبهاء الدين ونور الدين ونادر ابن خالك عبد الله وأخوك ابو رفاعي وابن عطيه والصغير والله وخايف لننسى حد والله ناس زي الألماس..