بعد وصفها بخرابة البيوت حلا شيحة تدافع عن دينا الشربيني عمرها ما كانت كدة ولكل من خاض في عرضها اتقوا الله
دافعت الفنانة “حلا شيحة” عن زميلتها الفنانة والنجمة “دينا الشربيني” بعد الأزمة التي تعرضت لها خلال الأيام الماضية. وارتباط اسمها بانفصال الفنان “كريم محمود عبد العزيز” عن زوجته “آن الرفاعي”.
حيث قدمت “حلا شيحة” دعمها للنجمة “دينا الشربيني” مشيرة إلى أن السوشيال ميديا دائمًا ما تروج الشائعات. وطلبت من الجمهور عدم الانسياق لمثل تلك الشائعات.
حلا شيحة توجه رسالتها للدفاع عن دينا الشربيني عبر إنستجرام
وقالت “حلا شيحة” في رسالتها التي نشرتها عبر حسابها الشخصي على موقع تبادل الصور والفيديوهات إنستجرام: “الجميلة دينا الشربيني … أعرفها من سنين طويلة، وأشهد إنها من أطيب وأرق القلوب. روح مرحة، خفة دم، وجدعنة، صديقة قريبة، ونيتها دائمًا طيبة مع الناس”.
وتابعت قائلة: “رسالتي للناس اللي بتهاجمها: للأسف، العتب مش بس على اللي بيصدق الإشاعات … العتب الأكبر على بعض الإعلاميين اللي فقدوا المهنية، وبقوا ينشروا كلامًا غير موثوق وغير صحيح … والناس تسمع وتنقل وتزود من عندها”.
واستكملت: “أولًا وبوضوح: دينا مش “خرابة بيوت” ولا عمرها كانت كده، الزواج والطلاق قسمة ونصيب، ومحدش بيخطف حد من حد .. وأنا أعرف دينا كويس … وأعرف إنها ما تعملش حاجة من اللي بيتقال ظلمًا”.
وأضافت “حلا شيحة”: “المشكلة إن السوشيال ميديا بقت ساحة مفتوحة للإشاعات، والتجريح، والخوض في الأعراض … وكأن الكلام ما بقاش له حرمة ولا أثر، مع إن الكلام المؤذي ممكن يكسر قلوب ويظلم ناس بريئة ويتسبب في أذى كبير”.
حلا شيحة: ربنا أمرنا مانخوضش في سمعة حد لأن دي من أخطر الذنوب
وتابعت “حلا شيحة” رسالتها قائلة: “وربنا أمرنا إننا نمسك لسانا، وما نخوضش في سمعة حد … لأن دي من أخطر الذنوب. وإحنا كلنا هنقف قدام ربنا ونتحاسب على كل كلمة قلناها أو نقلناها”.
وأرسلت رسالة للفنانة “دينا الشربيني” خلال حديثها قائلة: “ولحبيبتي دينا … سيبي كل ده وراك .. انت إنسانة جميلة من جوه وبره. وقلبك طيب ونيتك بيضا، وما يستاهلش تتأذي من كلام جاهل لا يعرف حقيقتك .. ربنا يكرمك بالخير اللي قلبك يستحقه”.
واختتمت “حلا شيحة” رسالتها قائلة: “ولكل من خاض في عرضها … اتقوا الله … الكلمة أمانة، وظلم الناس مش لعب. وكل واحد هيتحاسب أمام رب العالمين على اللي قاله واللي نشره واللي شارك في إيذاء إنسانة بريئة”. وقد قال رسول الله ﷺ: “من تتبّع عورة أخيه تتبّع الله عورته، ومن تتبّع الله عورته فضحه ولو في جوف بيته”. وقال ﷺ: “لا يدخل الجنة نمّام”.
وكان من الواضح أن “حلا” شيحة ترد على التصريحات المتتالية من المشاهير حيث أن الأمر لم يقتصر على رأي الجمهور في الموضوع. فقد هاجم عدد من المشاهير والإعلاميين النجمة “دينا الشربيني” بعد انتشار الأزمة وكانت آخرهم الإعلامية “مروة صبري”. التي صرحت تصريحات مسيئة للفنانة “دينا الشربيني” خلال برنامجها “قعدت ستات” حيث وصفتها بأنها “خرابة بيوت”.
مروة صبري تعتذر لدينا الشربيني على وصفها بخرابة البيوت
وقد اعتذرت “مروة صبري” عن إساءتها حيث كتبت منشورًا عبر حسابها الشخصي على موقع تبادل الصور والفيديوهات إنستجرام. قالت فيه: “في برنامجي (قعدة ستات) في فقرة بنتكلم فيها عن تريندات الأسبوع، سواء كانت خاصة بفنانين أو أخبار مهمة شغلت الناس. في الحلقة اللي فاتت أنا اتكلمت عن تريند تناول النجمة الفنانة دينا الشربيني وكان محور اهتمام السوشيال ميديا كلها. والحقيقة إني غلطت ومش عيب أبدًا لما نغلط نعتذر، وطبعًا ده وصلني من ردود أفعال كتير. سواء كان من المقربين مني أو من جمهور دينا الكبير اللي بيحبها في مصر والوطن العربي”.
وأضافت “مروة صبري”: “ورغم إني مقصدتش أبدًا الإساءة لها، ومكنش عندي سوء نية أبدًا. لكن المؤكد إن الشجاعة الأدبية بتستوجب إني اعتذر لدينا عن أي إساءة، وقبل كل ده لازم أقول إني بحترمها وكمان من معجبيها. وأخيرًا أنا شوفت إن الفيديو ده من واجبي إني اعمله احترامًا لمهنتي ولنفسي وكمان لجمهور برنامجي، واحترامًا وحبًا وتقديرًا لدينا. والملايين من جمهورها، دينا أنا بعتذر بجد وحقك عليا وطبعًا خالص الشكر لسيادة المستشار أشرف عبد العزيز”.
هجوم مروة صبري على دينا الشربيني
وكانت الحلقة التي أثارت الجدل وهاجمت “مروة صبري” خلالها النجمة “دينا الشربيني” قد قالت فيها: “أنا عندي شوية أسئلة لدينا الشربيني. ضاقت بيكي الدنيا وسيبتي كل رجالة الكون اللي مش متجوزين وروحتي للراجل اللي متجوز اللي بيحب مراته وولاده ومرتبط بيهم. ودي مش أول مرة انتي اسمك دايمًا مرتبط أنك طول الوقت على علاقات برجالة متجوزين أي حد بتشتغلي معاه. بيطلع إشاعة أنه دينا على علاقة بفلان بدون ذكر أسامي، انتي دايمًا بتروحي تشوفي مين الراجل المتجوز وتخربي بيته. لدرجة أنك للأسف الشديد أخدتي لقب “خرابة البيوت”.
وأضافت: “قررتي أنك تاخدي الراجل من مراته وتعيشي معاه قصة حب والموضوع باظ والناس كلها اتكلمت. لأ رجعتيه تاني باسم “الهنا اللي أنتوا فيه” الصراحة كان فيلم وشه وحش على كريم وبيته وولاده. الهنا اللي أنتوا فيه تحول أن كريم بيطلق مراته عشان يتجوزك وأنتي بالنسبة ليكي الموضوع عادي جدًا ومش فارق معاكي”.
وتابعت قائلة: “طيب هنقول أنك بتحبيه ومش قادرة تبعدي عنه مفكرتيش أنك بتبني سعادتك على تعاسة وقهر ست تانية. مفكرتيش تحطي نفسك مكانها مفكرتيش في ولاده اللي بيدعوا عليكي وبيشتموكي قدام السوشيال ميديا كلها. ولا أي حاجة هزتك من جواكي”.
واستكملت: “الإنسان اللي بيحب الرومانسي العاطفي بيفكر في اللي حواليه مبيبقاش أناني أنا هاخد الراجل ده من بيته ومش مهم البيت يخرب. ده اللي أنتي عملتيه كسبتي عداوة الجمهور كل الناس بتتكلم عنك بشكل غير لائق والناس بقت بتكرهك لأنك خربتي بيت. ومفيش حد قادر يسامحك أو متعاطف معاكي، أنا معرفش ليه عملتي كده مش من قلة الرجالة أنتي عندك مساحة أنك تتجوزي أي حد. أنتي فنانة حلوة ودمك خفيف تقدري أنك تحبي أي حد الموضوع موقفش عند الراجل المتجوز”.
واستكملت “مروة صبري” قائلة: “مش تحدي أنك تنتصري على مراته في حين أن هو مش حقك أصلاً، هتقولوا الراجل هو الصح وهي غلط. حتى لو هو غلط ورجعك للعلاقة دي تاني اسحبي نفسك أنتي ست المفروض تحسي بالست اللي زيك. إنما جو كيد الستات ده أنا مش قادرة أصدق داخله معركة عايزة تكسبيها”.
وأكملت: “ناس كتير بتقول الراجل بيتخطف مفيش راجل بيتخطف بيروح بمزاجه، اللي يقرر يخرب بيته بإيده بيغير مود مع زن الست التانية. اللي هي دينا الشربيني اللي عايزة تتجوز ودا اللي حصل”.
وأضافت: “الهجوم كله للأسف اتاخد على دينا مش كريم والناس متعاطفه معاه لأنهم شايفين أنك مسيطرة وبتزني عشان يرجعلك. انتي تعلمي أن بيته اتخرب بسببك وبتكرري التجربة ووصلتي بنته أنها تطلع تشتمك عايزة إيه تاني. كلمة زي دي كفيلة أنك تاخدي بعضك وتمشي، وأنا بقولك أهو أول ما تتجوزوا رسمي هتمشي ومش هتكملوا واللي كسبتيه عداوة الجمهور وبناته”.
وأكملت: “أنا كريم رغم إني بقول أن مفيش راجل بيتخطف، لكن هو صعبان عليا مين عارف مش يمكن معموله عمل ولا سحر. محدش عارف حاجة، كل الناس اللي بتحب كريم محمود عبد العزيز أقفوا جنبه شدوه من المصيبة دي. ويا دينا الشربيني اتقي ربنا كفاية اللي عملتيه وبتعمليه ومتعرفيش اللي جاي عليكي هيبقى عامل ازاي”.
وكانت “دينا الشربيني” قد قررت مقاضاة “مروة صبري” على تصريحاتها، وأصدرت قناة “ألفا” العارضة للبرنامج. بيانًا تؤكد أن ما قيل عبر الشاشة مجرد رأي “مروة صبري” وليس القناة.
