هالة صدقي تتحدث عن علاقتها بالمخرج محمد سامي وتتطرق للحديث عن حياتها الشخصية
حلت الفنانة الكبيرة “هالة صدقي” ضيفة على برنامج “كلام نواعم” حيث تحدثت خلال اللقاء عن عدة أمور ما بين حياتها الشخصية وحياتها الفنية.
هالة صدقي: محمد سامي كان بالنسبالي هدف
وتطرقت “صدقي” خلال الحديث إلى علاقتها بالمخرج “محمد سامي الذي قدمت معه أكثر من عمل فني.
حيث قالت عنه معبرة عن إعجابها به: “محمد سامي كان بالنسبة ليا هدف. كنت لما بشوف أفلام يوسف شاهين أقول أنا شبه الكاركتر بتاعته أنا إزاي مشتغلتش معاه، محمد سامي نفس الحكاية. أنا متابعاه بدقة وقلت أنا نفسي اشتغل معاه مع أن هو كان جاري وبيطلع وينزل معايا في الأسانسير ومعرفش أن دا محمد سامي”.
وتابعت قائلة: “هو بني آدم موهوب ولما بيلاقي حد مصحصح معاه ومركز معاه هو نفسه بيبقى في السما. وبياخدك ونطلع السما إحنا اندمجنا جدًا مع بعض وبعشقه على المستوى الشخصي والفني بحبه أن هو بيحب شغله ومتمكن منه. وكل حواسه مركزة في الشغل”.
هالة صدقي: زمان كان في بروفات ترابيزة دلوقت بندخل المسلسل ماعرفش مين البطل الي قدامي
وانتقلت خلال حديثها إلى الاختلافات ما بين الأعمال الفنية في فترة الثمانينات والآن حيث قالت: “في الثمانينات كنا بنحب شغلنا وكان في تدقيق بنعمل بروفات ترابيزة وبتتعرفي مين النجوم اللي معاكي وبنعمل بروفات كتيرة. بندخل نصور وبنكون جاهزين، دلوقتي بندخل المسلسل أو الفيلم أنا معرفش مين البطل اللي قدامي معملتش معاه بروفة. معرفش طريقة تمثيلة وأدائه إزاي فتقابل الناس في الاستديو أول مرة”.
وتابعت: “زمان في كاتب ليه أسلوبه في الحوار. دلوقتي الورش لما أجي اقرأ ألاقي دا مش أسلوب اللي كاتب. حكاية الورش مش بفضلها حاجة جديدة مفيهاش إبداع”.
وأما على الصعيد الشخصي فقد تحدثت “هالة صدقي” عن وجود الرجل كداعم في حياتها حيث قالت: “ولا ليه لازمة. لو هو إيجابي وناجح معايا في حياتي أهلاً وسهلاً، لو هو سلبي وبيؤذيني مع ألف سلامة، ودي مسألة حظوظ. الحكاية إنتي وحظك ممكن يبقى في راجل عظيم وأول ما يلاقيكي بتنجحي وبتنوري بتلاقي الشخصية اتغيرت”.
هالة صدقي: عندي كام صاحبة حلوين ومش عايزة أكتر من دول
وأوضحت “هالة صدقي” أنها ترى الآن أنه لا أهمية للرجل طالما لا يدعمها، كما أنها اعتادت الوحدة. حيث قالت موضحة أنها الآن أصبحت تفضل العزلة ولا تدخل أصدقاء جدد في حياتها.
وأضافت: “مؤخرًا بقى عندي عزلة مش حابة الناس أوي ومش عايزة اتعرف على حد جديد أنا عندي كام صاحبة حلوين. الحمد لله أوي ومش عايزة أكتر من دول اكتفيت لأن مخزون التسامح اللي عندي خلص فعشان مخسرش ناس تانية ومتضايقش”.
وتابعت قائلة: “إلهام شاهين هي اللي ببقى صريحة معاها من غير رتوش مرزبة وبتستحملني، وليلى علوي ويسرا”.
كما تطرقت “هالة صدقي” للحديث عن الصداقة بين المرأة والرجل قائلة: “عندي أصدقاء رجالة قريبين جدًا مني. وشايفة أن صداقة الرجل إلى حد كبير بتبقى مفيدة”.
آخر مشاركات الفنانة هالة صدقي الفنية
يذكر أن الفنانة الكبيرة “هالة صدقي” شاركت خلال الموسم الدرامي الرمضاني الماضي بعملين هما “إش إش” و “قهوة المحطة”.
حيث شاركها بطولة مسلسل “إش إش” كل من “مي عمر”، “ماجد المصري”، “انتصار”، “إدوارد”، “دينا”، “شيماء سيف”. “طارق النهري”، “عصام السقا”، “علاء مرسي”، “محمد الشرنوبي”، “ندى موسى”، “إيهاب فهمي”، “حمدي هيكل”، “أحمد عبد الله”. وعدد من ضيوف الشرف وهم: “محمد ممدوح”، “خالد الصاوي”، “كريم فهمي”، “محمد عبد الرحمن”، “أحمد زاهر”، والعمل من تأليف وإخراج “محمد سامي”.
بينما كان مسلسل “قهوة المحطة” من بطولة عدد من النجوم إلى جانب “هالة صدقي” ومن بينهم “أحمد غزي” و “بيومي فؤاد”. و “أحمد خالد صالح” و “انتصار” و “رشدي الشامي” و “ضياء عبد الخالق”، وهو من تأليف “عبد الرحيم كمال”، وإخراج “إسلام خيري”.
