أنغام تعلق باكية أنا مالي ردًا على اتهامها بأنها وراء حملات الهجوم على شيرين عبد الوهاب
بعد الهجوم الشديد على الفنانة “شيرين عبد الوهاب” بسبب تقديمها أغنية بطريقة البلاي باك في مهرجان موازين بالمغرب. تم تداول العديد من الأخبار بأن ما حدث هو عبارة عن حملة ممنهجة ضد “شيرين عبد الوهاب” وأنه معروف من وراء تلك الحملة.
أنغام ترد على الاتهامات بكونها وراء الحملات الممنهجة ضد شيرين عبد الوهاب
وبعد تردد الكثير من الأقاويل حول كون الفنانة المصرية “أنغام” وراء تلك الحملة، قررت الأخيرة الخروج والرد على تلك الاتهامات. خاصة أنها خلال الفترة الماضية كانت تمر بوعكة صحية ومازالت تتلقى العلاج داخل المستشفى حتى الآن.
حيث أجرت “أنغام” مداخلة هاتفية مع الإعلامية “لميس الحديدي” خلال برنامج “كلمة أخيرة” الذي تقدمه عبر شاشة قناة أون. أكدت خلالها أنها كانت في المستشفى منذ يوم السبت الماضي.
وقالت “أنغام” خلال مداخلتها: “أنا فعلًا في المستشفى بعد وعكة صحية حصلت بشكل مفاجئ يوم الأربعاء الماضي. شعرت بتعب شديد وتم نقلي للمستشفى صباح السبت، الحقيقة مكنتش عايزة حد يعرف علشان كنت تعبانة جدًا. ومكنتش قادرة أستقبل زيارات ولا أشرح حالتي الصحية، فقررت مفيش داعي أقول علشان أرتاح شوية”.
وتابعت: “كنت فاكرة إني داخلة المستشفى يوم واحد أخد مسكنات وأعمل فحوصات وأخرج، لكن الموضوع طلع محتاج فترة أطول. والحمد لله الموضوع بسيط بس محتاج صبر واستشارات”.
أنغام: كنت في المستشفى ولقيت الناس بتشتمني، الظلم المرة دي غير محتمل
وتطرقت “أنغام” خلال مداخلتها إلى الحديث عن الحملة التي استهدفتها واتهمتها بأنها وراء الهجوم على “شيرين”. حيث قالت: “أنا مكنتش مصدقة الكلام خالص، أنا مش من الشخصيات اللي بتحب تدافع عن نفسها ولا بترد على الشائعات. ولا بدخل في مهاترات، وده منهجي في حياتي من زمان سواء على المستوى الشخصي أو المهني. أنا طول عمري بسيب الأمور تختفي لوحدها، وربنا بينصفني دايمًا”.
وأضافت قائلة: “أنا ست اللي يعرفني كويس عارف إني مش بتاعة مشاكل، ولا بدعي المثالية، أنا إنسانة عادية بحب شغلي وبحترم جمهوري. وحتى اللي مش بيحبني بحترمه، لأن مفيش فنان بيتفق عليه كل الناس، وده طبيعي لأن الأذواق بتختلف”.
واستكملت “أنغام”: “الظلم المرة دي غير محتمل، لا قادرة أتكلم ولا قادرة أسكت، لكن الأمر وصل لدرجة التجريح والشتائم والتلميحات اللي مش مقبولة. من ناس المفروض مسؤولين وزملاء، البعض بيقول إحنا عارفين مين ورا الحملة، والفانز بتوع المطربة المنافسة بيتكلموا وكأنهم عارفين حاجة. وفي مواقع كتبت اسمي بشكل مباشر”.
أنغام تستنكر الاتهامات الموجهة إليها وتعلق: تحملت أربع سنين من التلميحات
وتابعت قائلة: “ليه الشتيمة والتجريح وأنا في المستشفى؟! محدش كان يعرف غير أقرب الناس ليا. وأنا على سرير المستشفى لقيت ناس بتبعتلي وبتشتمني وأنا مالي! هو أنا ليه علاقة بالمشكلة اللي حصلت في الحفلة؟!. أنا مالي! ضمائركم راحت فين؟”.
واستكملت “أنغام” مستنكرة ما حدث: “حتى لو مكنتش في المستشفى، مالي؟! أنا تحملت أربع سنين من التلميحات حتى منها شخصيًا. ومع ذلك ماردتش ولا مرة، كنت بزعل بيني وبين نفسي وكنت بعذرها كتير لكن نوصل لمرحلة توجيه الناس ضدي؟!. تطلعوني كأني بتآمر وأقود حملات ضد زميلة؟! ده ظلم وحرام وعيب”.
وأكدت: “أنا لا أتهمها شخصيًا، لكن في ناس حواليها بيقولوا كده وبيوجهوا الناس لكده أنا مش هقول إني أكبر من كده. وهي كمان أكبر من كده، بس عيب اللي بيحصل واللي بيحاولوا يقربوا منها بطريقة مغلوطة يقولوا لها تحبها وتشجعها براحتك. لكن مالهمش دعوة بيا”.
أنغام تتوعد مروجي الشائعات
وتوعدت “أنغام” مروجي الشائعات قائلة: “أي شخص هيتمادى وهيجيب سيرتي، مش هسكت أنا فعلاً تعبت. ورفعت قضية على شاب قبل كده كتب عني على تويتر وقال ‘مش هترحمي شيرين يا أنغام’ وكسبت القضية واتحبس. وأي حد هيتجرأ تاني ويزج بإسمي مش هسكت”.
واستكملت “أنغام” باكية متأثرة بما يحدث لها حيث قالت: “كفاية ظلم، كفاية كره، كفاية حقد، أنا تعبت، سيبوني في حالي. محدش ليه دعوة بنيتي، ربنا اللي هيحاسبني، كفاية توجيه حملات ضدي”.
واختتمت حديثها قائلة: “لما إعلامي يطلع يدافع عن شيرين له كل الاحترام، لكن وانت بتبص على شيرين، بص كمان على أنغام. اللي مالهاش علاقة بالموضوع، كفاية مقارنة عقيمة ومؤذية، هي اسمها شيرين وأنا اسمي أنغام، ليها جمهورها وليا جمهوري. ربنا يكرمنا كلنا، متدعيش ليا، لكن على الأقل بلاش تدعي عليّ وتظلمني”.
ووجهت “أنغام” رسالة مؤثرة لجمهورها حيث قالت: “أنا عايزة من الناس اللي بتحبني مايحطونيش في مقارنة مع حد. حبوني علشاني أنا، مش علشان أكون أحسن من حد، ماتقارنونيش بحد، ولا تقارنوا حد بيا حتى لو المقارنة في صالحي، أنا مش عايزاها. ده شيء مش مقبول ومش بيكبرني، ولو بتحبوني بجد، مش ده الأسلوب اللي تقدروا تكرموني بيه أو تدعموني بيه. لو سمحتوا، ماتحطونيش في مواقف تخلي الناس تعتقد إن أنا زقتكم تعملوا ده”.
