تامر حسني يطالب محمد سامي بالرجوع عن قراره

بالرغم من وضوح قرار المخرج “محمد سامي” باعتزاله الدراما التلفزيونية وكتابته منشورًا مطولاً عبر فيسبوك يوضح من خلاله وجهة نظره. وتفاصيل اتخاذه القرار، إلا أن الكثير من نجوم الفن متأثرين جدًا بهذا القرار حيث يرون أن الدراما التلفزيونية ستخسر موهبة كبيرة مثل “محمد سامي”.

تامر حسني لـ محمد سامي: انت المخرج الوحيد في تاريخ مصر اللي مفشلش ولا مرة

وبعد نشر “محمد سامي” بيانه تلقى العديد من التعليقات والمنشورات الداعمة، وقد كان أبرزها تعليق الفنان والمطرب “تامر حسني” على بيان “سامي”. حيث قال في تعليقه: “أوعى تكون عايز تبعد عشان أي إحباط جايز يكون فعلاً في بعض المشاهد اللي الناس انتقدتها. وأنا شخصياً استغربتها شوية وقولت جوايا أنك مش محتاج تعملها أصلاً لأن عندك الحقيقي والأهم بس على رأيك الفنون جنون. أحياناً فكرة مجنونة تنال الإعجاب وفكرة لأ، بس ده ميخليناش ننسى إنها بعض مشاهد مش بعض أعمال. لأنك بالفعل المخرج الوحيد في تاريخ مصر اللي مفشلش ولا مرة.

وتابع قائلاً: “يمكن الحظ محالفكش أوي في عمل ولا ٢ على مدار ١٤ سنة، ودي حاجة مينفعش الجمهور ينساها لك. أنت قدمت مسلسل “آدم” اللي جمع كل المصريين وكل الوطن العربي يتفرجوا عليه زي ماتشات الكورة، بسبب أنه أتكلم عن قضية تخص كل الوطن. وكان بداية لصورة جديدة أول مرة كانت بتتقدم في مصر، وبعدها “سبق الإصرار” و “حكاية حياة” اللي كانوا نقلة كبيرة في ديكورات الدراما المصرية. وبعدين “الأسطورة” و “البرنس” و “جعفر العمدة”، اللي حققوا نجاحات ساحقة، وكانوا أعلى نسبة مشاهدات في الدراما بشكل عام. وبعدهم “نعمة الأڤوكاتو” و “إش إش” و “سيد الناس” اللي برضو كل واحد فيهم يا أعلى مشاهدة يا تاني أعلى مشاهدة”.

تامر حسني لـ محمد سامي: هزعل منك لو مشيت محبط وهي دي ضريبة الناجحين

وأضاف النجم “تامر حسني” مناشدًا محمد سامي بالعودة في قراره قائلاً: “هزعل منك لو هتمشي محبط وأنت أنجح حد. الشجرة الخضراء الجميلة ساعات بيطلعلها ورق أصفر بسيط عادي بيتقص وبتفضل شجره كبيرة وجميلة وده التطوير الطبيعي للبني آدم. واللي بيمر بيه أي ناجح بيطور وعنده شخصية، بدليل مسلسلاتك بيتقال عليها مسلسلات محمد سامي، وتركيز الناس معاك دليل على حبهم لأعمالك. ورغم إن بعضهم بينتقدوها بس متابعينها حرف حرف، ونقدهم ليك بيبقى على قد حجمك وهي دي ضريبة الناجحين الكبار”.

واستكمل “حسني” تعليقه قائلاً: “سافر وكمل حلمك وأنت منتصر بتاريخك وأوعى تُحبط. وأنا عارف إن محمد سامي اللي اكتشفته أنا وقدمته للصناعة وهو عنده ٢٧ سنة، لا يمكن هيتهز. ممكن يزعل يومين ويراجع نفسه في مشاهد، أنا مبسوط منك أنك بمنتهى الشجاعة الأدبية اعتذرت على تقديمها. خد راحة شوية وارجع أقوى من الأول، وأنا واثق من اللي هتسافر عشانه أنه قرار هيضيف نقلة كبيرة لمشوارك. أوعى تخلي الزعل من بعض المشاهد ينسيك أنت قدمت ايه للدراما “.

واختتم تامر حسني تعليقة قائلاً: “ياريت قبل ما نقسوا على سامي بالطريقة دي، نفتكر هو أمتعنا سنين قد ايه بمسلسلاته. وأنا ذكرتها كلها عشان لو حد ناسي أفكره، وعشان لو هو محبط يجمد تاني، ربنا ينور طريقك وترجع أقوى وأقوى من أي وقت. واثق فيك يا حبيبي، وأنا هفضل أخوك الكبير، وفي ضهرك إن شاء الله طول العمر يا بطل”.

نبذة عن أعمال محمد سامي

يذكر أن أول أعمال المخرج “محمد سامي” كانت من بطولة النجم “تامر حسني” الذي قدمه للجمهور لأول مرة من خلاله. وهو مسلسل “آدم” الذي تم تقديمه عام 2011.

ومن الجدير بالذكر، أن “محمد سامي” قدم العديد من المسلسلات الدرامية الناجحة خلال 15 عاماً، حيث بدأ مشواره الفني بإخراج مسلسل “آدم”. الذي قام ببطولته النجم “تامر حسني” وعرض في شهر رمضان 2011.

وبعدها قدم أعمالاً درامية ناجحة مع الفنانة “غادة عبد الرازق”، من بينها مسلسل “حكاية حياة” و “مع سبق الإصرار”. وتعاون بعدها مع النجم “محمد رمضان” في عدد من المسلسلات من بينها “الأسطورة” عام 2016، و “البرنس” و “جعفر العمدة” الذي قدمه عام 2023. وفي رمضان 2024، قدم “نعمة الأفوكاتو” من بطولة زوجته النجمة “مي عمر”. وهذا العام شارك في رمضان بمسلسلين هما “سيد الناس” للنجم “عمرو سعد” و “إش إش ” للفنانة “مي عمر”.

بيان اعتزال محمد سامي للدراما التلفزيونية

ومن الجدير بالذكر أيضًا، أن انتشار خبر اعتزال “محمد سامي” جاء بعد نشره بيانًا مطولاً عبر حسابه الشخصي على موقع التواصل الاجتماعي فيسبوك. قال فيه: “وداعًا الدراما التلفزيونية، السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي ١٥ سنة. قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة. وكان دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور”.

وتابع “محمد سامي” قائلاً: “يمكن المقربين ليا عارفين إني واخد القرار ده من فترة وهو اعتزال الإخراج التلفزيوني. ولكن كنت بنتهي من التزامات موقعة مع شركات ونجوم والحمد لله انتهيت منها وكان أخرها ٢٠٢٥، معنديش حاجة أكتر أقدر أقدمها في التلفزيون. وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر علي الدوام هو الله وحده. الحمد لله أخر عملين ليا إش إش وسيد الناس حققوا نجاح أنا سعيد بيه”.

وأضاف: “كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم. وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز”.

واستكمل “سامي” موجهًا كلامه للجمهور: “بعتذر عن أي مشهد قدمته أثناء الرحلة ولم يلقى استحسان الجمهور أو إعجابهم. في الأخر الفنان دايما بيجرب والفنون جنون زي ما بيقولوا، ادعولي الفترة الجاية عندي سفر خارج مصر لفترة عامين. بتعلم فيهم حاجة جديدة بدرسها، حاجة كان نفسي أتعلمها من زمان وأجلتها كتير لحد ما لقيت نفسي بكبر. وخايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجة بيحبها. عشان يعمل حاجة تانية بيحبها برضه وعايز يجربها بس محتاج عيلة تسانده علي اتخاذ قراره. كل التوفيق لكل زمايلي وبحبكم وبشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة”.