أول رد من رامي صبري بعد هجوم ويجز عليه ممكن حد سخنه عليا

حل الفنان “رامي صبري” ضيفًا على برنامج “عرب وود” حيث تحدث خلال لقائه عن الأزمة التي بينه وبين نجم الراب “ويجز”.

رامي صبري عن ويجز: هو فنان بيعمل مزيكا حلوة ولسة معندوش خبرة الرد

حيث قال في أول رد له بعد هجوم “ويجز” عليه: “زمان كنت بزعل وأنا قد ويجز كده، وكنت بعمل أكتر منه على فكرة. وعارف علشان هو لسه صغير معندوش خبرة الرد وأنا متفهم هذا الأمر”.

وأضاف قائلاً: “وشخصياَ أنا بحبه أوي ومعنديش مشكلة معاه بحب فنه وقولت كده في البرنامج أنا معرفش ليه هو اتضايق كده. بس ممكن حد سخنه عليا إنما هو فنان ويعمل مزيكا حلوة جداَ وبقول كده على طول، وأنا مش ضد أي حد. أي حد من حقه يعمل أي حاجة ما دام مش بيأذي أي حد”.

وكانت الأزمة التي نشبت بين الثنائي وأثارت جدلاً واسعًا حينها، عندما انتقد “رامي صبري” الأغنيات التي يقدمها “ويجز”. وأنه لم يكن يفهم معاني أغانيه وأكد “رامي” أن اسمه يأتي في قائمة أهم 5 نجوم في مصر. وأن أهم 5 مغنيين في مصر هم: “عمرو دياب” و “تامر حسني” و “حماقي” و “رامي صبري”. أضاف على حد قوله: “مفيش حد تاني”.

ويجز يرد على رامي صبري بعد تصريحاته عن أغاني الراب

وهو ما أثار غضب “ويجز” من تلك التصريحات ليقرر الرد عليها من خلال مقطع فيديو مصور. نشره عبر حسابه الشخصي على موقع تبادل الصور والفيديوهات إنستجرام. حيث قال فيه: “هتكلم على فنان فاكر إن عنده صلاحية يتكلم على حد والناس تسمع وتسكت. الفنان ده اسمه رامي، كل ما يقعد 5 شهور يزهق يطلع يتكلم في التليفزيون عن بتوع الراب. طيب هتتكلم امتى على بتوع البوب اللي أنت منهم؟ وهتتكلم امتى عن فنك ومجالك؟”.

وتابع قائلاً: “أنا شايف إنك مابتفهمش حاجة في الراب ولا بتفهم الكلام بتاعه، أو زي ما انت قولت قبل كده، ومش هتعرف تعمله. وأنا راجل مثلاً لو لقيت واحد بيعرف يسوق عجلة وأنا مبعرفش بحترمه، ليه عشان هو عمل حاجة انا مبعرفش اعملها. وغير اللي أنا عملتها، اشتغل على نفسه في حاجة أنا مشتغلتش على نفسي فيها”.

ويجز أثناء خلافه مع رامي صبري: انت بعيد أوي

وقال مضيفاً: “انت مبتقدرش الفنانين دول وشايفهم كده بيحاولوا يوصلوا لليفل انت فيه في حين انهم معديينك. أنت مش رقم 2 يا رامي انت رقم 19، أنت بعيد أوي”.

ورغم الخلاف، تحدث “رامي صبري” عن إمكانية تعاونه مع “ويجز”، قائلًا: “أوافق أشتغل مع ويجز، هو شاطر ومجتهد وناجح. لكن لسه عند كلامي إن في أغاني ليه مبفهمش كلماتها لحد دلوقتي”.

وتحدث الفنان “رامي صبري” في وقت سابق خلال وجوده ضيفًا على برنامج “حبر سري” الذي تقدمه الإعلامية “أسما إبراهيم”. ويعرض على قناة “القاهرة والناس”، عن المهرجانات ومطربي الراب، وقال: “المهرجان مش بيتغنا حلو والناس بتحبه وأنا ساعات بسمعه. بس مش هو ده اللون اللي ممكن أغنيه”.