مي عز الدين: عايزني اقوم قناة Mbc مصر2 لوحدي

 عبرت مي عزالدين عن غضبها الشديد من عرض مسلسلها بشكل حصري على قناة Mbc مصر2، والتي وصفتها بأنها غير معروفة للمشاهدين.

مي قالت: طيب أنا قضيت اليومين اللي فاتو بحاول أطالب إدارة قنوات Mbc مصر بزيادة إعادات المسلسل وعرضه علي قناة Mbc مصر كمان لأنه بيتعرض علي Mbc مصر 2 فقط و دي ناس كتير مكانتش تعرفها ولا منزلاها وهو المسلسل الوحيد (اللي من إنتاج شركة تابعة ليهم و بالتالي كان من المنتظر الاهتمام بعرضه على قنواتهم الاثنين ) ومع ذلك مش راضيين يخلوه بيتعرض علي القناتين بتوع Mbc مصر و سايبينه علي Mbc مصر 2 بس.

وكشفت عن رد القناة عليها، بقولها: وفي الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف!!! يعني انا كده مطلوب مني أقوم قناة لوحدي!!! تمام وانا بقول لmbc قبلت المسئولية وبإذن الله ربنا يكرم والقناة والمسلسل يتشافو والحمدلله فيه علامات باينة من كم الإعلانات اللي جه من بعد اول حلقة للمسلسل وغيره وانا هعتبره إمتحان ليا يعرفني قدري عند الناس و هل فعلا بيحبو مسلسلاتي أو لا ونسبة الجماهيرية اللي وصلتها ايه مع اني مهما كان ليا جمهور اكيد كنت اتمني اني اتشاف من الناس اللي مش من جمهوري لأن ساعات بتكون كا مشاهد ملكش في ممثل لكن لو قابلت حلقة لمسلسله بالصدفه وعجبتك بتقرر تتابعه وده في الاخر بيبقي خلاني كسبت مشاهد جديد بقي بيحب يتفرج علي اعمالي وده طبعا مش هيحصل السنة دي لأن مفيش حد بيبقي معدي وبيشوف القناه دي بالصدفة الناس لسه اصلا بتتعرف علي طريقها من خلالنا وبينزلوها.

وأضافت: لكن قدر الله وما شاء فعل وبالتالي عندي طلبين اولا بطلب من جمهوري و روابط الفانز بتاعتي تساعدني في نشر تردد القناه لكل الناس اللي مش عارفة تجيبها وبطلب من صحافتنا تشهد انا بدأت رمضان بقناة كم الناس اللي عارفها قد ايه و صفحتها حتي على الفيسبوك فيها كام وبعد رمضان تقولولي بأمانة هل قدرت فعلا في ظل الظروف دي أنجح ولا لأ.. و متابعة نسبة مشاهدة القناة على اخر رمضان هتكون وصلت لأيه و مشاهدة المسلسل علي موقع شاهد دوت نت وصلت لأيه لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة و الجمهور ساعتها تعويض يكفيني.

Tags

مواضيع ذات صلة